قازاقستاندا ستۋدەنتتىك جاتاقحانالارعا ورنالاستىرۋدا الەۋمەتتىك وسال توپتارعا باسىمدىق بەرىلەدى. بۇل تۋرالى جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى اكەركە ابىلايحان مالىمدەدى، دەپ حابارلايدى infohub.kz سايتى.
ونىڭ ايتۋىنشا، رەسپۋبليكادا 281 جاتاقحانا پايدالانۋعا بەرىلگەن، ولاردىڭ سىيىمدىلىعى 72 125 ورىندى قۇرايدى. ونىڭ ىشىندە 182ء-سى جوعارى وقۋ ورىندارىنىڭ ستۋدەنتتەرىنە ارنالعان — بۇل 51 323 ورىن.
ەڭ الدىمەن، اتا-اناسىنىڭ قامقورلىعىنسىز قالعان ستۋدەنتتەرگە، مۇگەدەكتىگى بار ادامدارعا، كوپبالالى جانە از قامتىلعان وتباسىلاردىڭ وكىلدەرىنە، اۋىل جاستارىنا، سونداي-اق «سەرپىن» جوباسىنىڭ قاتىسۋشىلارى مەن قانداستارعا ورىن بەرىلەدى. سونىمەن قاتار، بۇل تىزىمگە ستۋدەنتتەردىڭ باسقا دا الەۋمەتتىك وسال ساناتتارى كىرەدى.
ورنالاستىرۋعا بايلانىستى ماسەلەلەردى جەدەل شەشۋ ءۇشىن مينيسترلىك سيتۋاسيالىق جانە داعدارىس ورتالىقتارىن اشتى. سيتۋاسيالىق ورتالىق قازاق ۇلتتىق قىزدار پەداگوگيكالىق ۋنيۆەرسيتەتىنىڭ بازاسىندا، ال داعدارىس ورتالىعى تىنىشبايەۆ ۋنيۆەرسيتەتىنىڭ بازاسىندا جۇمىس ىستەيدى. ابىلايحاننىڭ تۇسىندىرۋىنشە، سيتۋاسيالىق ورتالىق ستۋدەنتتەردى جاتاقحانالارداعى بوس ورىندار تۋرالى حاباردار ەتەدى، ال داعدارىس ورتالىعى فورس-ماجورلىق جاعدايلاردا ۋاقىتشا تۇرعىن ۇيمەن قامتاماسىز ەتۋگە كومەكتەسەدى.
سونداي-اق، ەلىمىزدىڭ ءاربىر وڭىرىندە ستۋدەنتتەر ءۇشىن ومبۋدسمەندەر تاعايىندالدى.
بۇدان باسقا، 2023 جىلدىڭ 1 قىركۇيەگىنەن باستاپ جەتىم بالالار ساناتىنداعى ستۋدەنتتەر، سونداي-اق I جانە II توپتاعى مۇگەدەكتىگى بار ادامدار مەن بالا كەزىنەن مۇگەدەكتەر جاتاقحانادا تۇرعان جاعدايدا 29 اەك (100 مىڭ تەڭگە) مولشەرىندە وتەماقى الۋعا قۇقىلى.
بۇعان دەيىن «كۋرسيۆ» استاناداعى «كيبەرسپورت» ۋنيۆەرسيتەتىنىڭ جاتاقحاناسى الەۋمەتتىك جەلىلەردە تاڭدانىس تۋدىرعانىن جازعان بولاتىن.