شۆەسيانىڭ ورتالىق بولىگىندەگى مەكتەپتە بولعان قىلىش شابۋىلىنىڭ قۇربانى 17 جاستاعى قىز ەكەنى راستالدى. بۇل تۋرالى infohub.kz حابارلادى.
جەرگىلىكتى بيلىكتىڭ مالىمەتىنشە، جۇما كۇنى تۇستەن كەيىن فاگەرستا قالاسىنداعى برينەلل مەكتەبىندە بولعان شابۋىلدا 12 جانە 17 جاستاعى ەكى ۇل دا اۋىر جاراقات الدى، ال تاعى ءبىر ادام جەڭىل جاراقاتتاندى. ەسىمى اتالماعان 18 جاستاعى جىگىت ۇستالىپ، پوليسيا بۇل ءىستى كىسى ءولتىرۋ جانە كىسى ولتىرۋگە وقتالۋ رەتىندە قاراستىرىپ جاتقانىن مالىمدەدى.
شۆەسيا پرەمەر-مينيسترى ۋلف كريستەرسسون مەن وپپوزيسيا جەتەكشىسى ماگدالەنا اندەرسسون سەنبى كۇنى تاڭەرتەڭ مەكتەپكە بارىپ، قۇربانداردى ەسكە الۋ ءۇشىن گۇل قويدى. مەكتەپ وقۋشىلارى جازعى دەمالىستان كەيىن ساباققا جاڭا عانا ورالعان ەدى، سول كۇنى تۇستەن كەيىن قايعىلى وقيعا بولدى. پوليسيا كەيىنىرەك وقيعا ورنىنا شاقىرىلعاننان كەيىن وق اتقانىن راستادى، ءبىراق كۇدىكتىنى ۇستاۋ كەزىندە وعان وق تيگەن-تيمەگەنىن ايتپادى.
شۆەسيانىڭ قوعامدىق تەلەارناسى كۇدىكتىنىڭ دۋلىعا كيگەنىن حابارلادى. جەرگىلىكتى ب ا ق ونىڭ بۇرىنعى وقۋشى ەكەنىن دە جازدى. جۇما كۇنى ايماقتا توتەنشە جاعداي جاريالانعان، ءبىراق سەنبىگە قاراي اياقتالدى. SVT مالىمەتىنشە، مەكتەپتە 500-گە جۋىق وقۋشى بار، ول استانا ستوكگولمنەن سولتۇستىك-باتىسقا قاراي 170 كم (105 ميل) جەردە ورنالاسقان.
پوليسيا كۇدىكتىگە قاتىستى ەكى تۇرعىن ءۇيدى ءتىنتۋ جۇرگىزگەنىن حابارلادى. جۇما كۇنى شۆەسيا پرەمەر-مينيسترى ۋلف كريستەرسسون بۇل شابۋىلدى «اۋىر وقيعا» دەپ سيپاتتاپ، X الەۋمەتتىك جەلىسىندەگى جازباسىندا «ءبىز بۇل ارەكەتتىڭ ارتىندا نە تۇرعانىن بىلمەيمىز، ءبىراق پوليسيا وتە قارقىندى جۇمىس ىستەپ جاتقانىن بىلەمىز» دەدى. شۆەسيا كورولى كارل XVI گۋستاۆ بۇل حاباردى «قايعى مەن قاسىرەتپەن» قابىلداعانىن ايتتى.