باتىس قازاقستان وبلىسىنىڭ سىرىم اۋدانىندا جالعىز باسپاناسى اپاتتى دەپ تانىلعان 72 وتباسى جاڭا پاتەرلەرگە يە بولدى. جىمپيتى اۋىلىندا ەكى ءۇش قاباتتى ءۇيدى پايدالانۋعا بەرۋ ءراسىمى ءوتىپ، وعان وبلىس اكىمى ناريمان تورەعالييەۆ قاتىستى، دەپ حابارلايدى infohub.kz سايتى.
بيىل جالعىز باسپاناسى اپاتتى دەپ تانىلعان ازاماتتارعا كوممۋنالدىق تۇرعىن ءۇي قورىنان باسپانا بەرۋ جانە ءبولۋ ءتارتىبى جاڭارتىلدى. ءتيىستى وكىلەتتىكتەر قايتادان جەرگىلىكتى اتقارۋشى ورگاندارعا بەرىلدى. بۇعان دەيىن وسى ساناتتاعى ازاماتتاردى باسپانامەن قامتاماسىز ەتۋ «وتباسى بانك» ارقىلى جۇزەگە اسىرىلىپ كەلگەن.
وبلىس اكىمى اپاتتى ۇيلەردە تۇراتىن تۇرعىنداردى قولداۋ تەتىكتەرىنىڭ كەڭەيۋى وسى باعىتتاعى جۇمىستى جۇيەلەۋگە جانە وعان جاڭا سەرپىن بەرۋگە مۇمكىندىك بەرگەنىن اتاپ ءوتتى. جىل سوڭىنا دەيىن كەزەكتە تۇرعان وسى ساناتتاعى ازاماتتاردىڭ 50 پايىزىن باسپانامەن قامتاماسىز ەتۋ جوسپارلانۋدا.
«پرەزيدەنت قاسىم-جومارت كەمەل ۇلى توقايەۆ باستاماشىلىق ەتكەن حالىق كونستيتۋسياسىندا ادامنىڭ ءومىر ءسۇرۋ ساپاسىن ارتتىرۋ مەملەكەت دامۋىنىڭ باستى ستراتەگيالىق باعىتتارىنىڭ ءبىرى رەتىندە ايقىندالعان. وسىعان بايلانىستى ءوڭىر تۇرعىندارىن باسپانامەن قامتاماسىز ەتۋ ماڭىزدى مىندەتتەردىڭ ءبىرى. ءبىز اۋىلدىق جەرلەردە تۇرعىن ءۇي قۇرىلىسىنىڭ كولەمىن ۇلعايتۋعا ەرەكشە كوڭىل بولەمىز. جىل باسىندا جالعىز باسپاناسى اپاتتى دەپ تانىلعان 600-گە جۋىق ازامات باسپانا كەزەگىندە تۇردى. ولاردىڭ ءبىر بولىگى وبلىس ورتالىعى مەن جاڭاقالا اۋدانىندا جاڭا پاتەرلەرگە قول جەتكىزدى. رەسپۋبليكا كۇنى قارساڭىندا كوپتەن كۇتكەن باسپاناعا قول جەتكىزگەن جاڭا قونىس يەلەرىن قۇتتىقتايمىن! ءار وتباسىعا باقىت، بەرەكە جانە مولشىلىق تىلەيمىن!» — دەدى ناريمان تورەعالييەۆ.
ايتا كەتەيىك، سىرىم اۋدانىندا باسپانا الۋ كەزەگىندە 800-گە جۋىق ازامات تىركەلگەن. ولاردىڭ 160-تان استامى جالعىز باسپاناسى اپاتتى دەپ تانىلعان ازاماتتار مارتەبەسىنە يە. كەلەسى جىلى وسى ساناتتاعى وتباسىلارعا تاعى 36 پاتەردىڭ كىلتى تابىستالادى.