جامبىل وبلىسىندا ايەل قايتالاپ اتا-انالىق مىندەتىن ورىنداماعانى ءۇشىن اكىمشىلىك جاۋاپكەرشىلىككە تارتىلدى. ونىڭ كامەلەتكە تولماعان بالالارىنىڭ كوزىنشە جۇبايىمەن بىرگە ىشىمدىك ىشكەنى سەبەپ بولدى، دەپ حابارلايدى infohub.kz سايتى.
جامبىل وبلىسى سوتتارىنىڭ رەسمي Telegram-ارناسىندا جازىلعانداي، كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوت اناعا قاتىستى كامەلەتكە تولماعانداردى تاربيەلەۋ جونىندەگى مىندەتتەردى قايتالاپ ورىنداماۋ فاكتىسى بويىنشا اكىمشىلىك قۇقىق بۇزۋشىلىق تۋرالى ءىستى قارادى (اكىمشىلىك قۇقىق بۇزۋشىلىق تۋرالى كودەكستىڭ 127-بابىنىڭ 2-بولىگى).
2026 جىلعى تامىزدا مويىنقۇم اۋدانىنىڭ تۇرعىنى تارازداعى ۋاقىتشا تۇراتىن جەرىندە جۇبايىمەن بىرگە ورتاشا دارەجەدەگى الكوگولدىك ماساڭ كۇيدە بولعانى انىقتالدى. ۇيدە ونىڭ 2024 جانە 2025 جىلى تۋعان ەكى كىشكەنتاي بالاسى بولعان. بولعان جايت تۋرالى پوليسيا قىزمەتكەرلەرىنە كورشىلەرى حابارلاعان. تەكسەرۋ بارىسىندا تۇرعىن ءۇيدىڭ انتيسانيتاريالىق جاعدايى جانە بالالاردىڭ ءتيىستى دامۋىنا جاعدايدىڭ مۇلدەم جوقتىعى تىركەلدى.
سوت سونداي-اق وسى ايدىڭ ىشىندە انانىڭ اقبتك-نىڭ 127-بابىنىڭ 1-بولىگى بويىنشا جاۋاپكەرشىلىككە تارتىلعانىن انىقتادى.
سوتتا ايەل كىناسىن تولىق مويىنداپ، كامەلەتكە تولماعان بالالارىنىڭ كوزىنشە جۇبايىمەن بىرگە سپيرتتىك ىشىمدىك ىشكەنىن راستادى.
اقبتك-نىڭ 127-بابىنىڭ 2-بولىگىنىڭ سانكسياسى 15 ايلىق ەسەپتىك كورسەتكىش مولشەرىندە ايىپپۇل سالۋدى نە 5 تاۋلىككە دەيىنگى مەرزىمگە اكىمشىلىك قاماۋعا الۋدى كوزدەيدى.
سوت كىنانى مويىنداۋ مەن كامەلەتكە تولماعان بالالاردىڭ بولۋىن جاۋاپكەرشىلىكتى جەڭىلدەتەتىن ءمان-جايلار دەپ تانىدى.
سوت قاۋلىسىمەن ايەل اقبتك-نىڭ 127-بابىنىڭ 2-بولىگى بويىنشا كىنالى دەپ تانىلىپ، وعان 15 ايلىق ەسەپتىك كورسەتكىش (64 875 تەڭگە) مولشەرىندە ايىپپۇل سالىندى.
قاۋلى زاڭدى كۇشىنە ەندى.