«تەد لاسسو» سەريالىنداعى رولىمەن تانىمال امەريكاندىق اكتەر دجەيسون سۋدەيكيس ناعىز فۋتبولدا باعىن سىناۋعا كۇتپەگەن ۇسىنىس الدى. ۆيلنيۋستىك «جالگيريس» ايەلدەر كلۋبى ونى ءبىر اپتاعا كوماندانى باسقارۋعا، جاتتىعۋ وتكىزۋگە جانە رەسمي ماچقا قاتىسۋعا شاقىردى، دەپ حابارلايدى infohub.kz سايتى.
«جالگيريس» سۋدەيكيسكە ارنايى بەينەۇندەۋ جازدى جانە ۇسىنىستى ونىڭ وكىلدەرىنە جەتكىزدى. اكتەردى كۇزدە ۆيلنيۋستە كۇتەدى.
ەگەر سۋدەيكيس كەلىسسە، وعان ءبىر اپتا بويى كوماندانى ءوز بەتىنشە باسقارۋ مۇمكىندىگى بەرىلەدى. ول تاكتيكانى تاڭداي الادى، قۇرامدى انىقتاي الادى جانە ليتۆا چەمپيوناتىنىڭ رەسمي ماچى كەزىندە شەشىم قابىلداي الادى.
ۇسىنىس كەزدەيسوق پايدا بولعان جوق. «تەد لاسسو» ءتورتىنشى ماۋسىمىندا سۋدەيكيستىڭ كەيىپكەرى «ريچموندتىڭ» ايەلدەر كومانداسىمەن جۇمىس ىستەي باستايدى. ۆيلنيۋس كلۋبى بۇل سيۋجەتتىك جەلىنى سەريالدان ناعىز فۋتبول الاڭىنا تىكەلەي كوشىرۋدى ۇيعاردى.
يدەيانىڭ تاعى ءبىر ەرەكشەلىگى بار. سۋدەيكيستىڭ اكە جاعىنان ليتۆالىق تامىرى بار، سوندىقتان «جالگيريستە» بۇل ۇسىنىس ونى قىزىقتىرۋى مۇمكىن دەپ ەسەپتەيدى. اكتەردىڭ ۆيلنيۋسكە كەلىپ، ناعىز جاتتىقتىرۋشى رولىندە ءوزىن سىناۋعا كەلىسەتىنى ازىرگە بەلگىسىز.
ءبىر قىزىعى، «جالگيريس» اتاۋى بۇرىنعى كسرو-نىڭ بارلىق جەرىندە جانكۇيەرلەرگە جاقسى تانىس. كەڭەس جىلدارى ۆيلنيۋس كلۋبى ليتۆا فۋتبولىنىڭ فلاگمانى بولدى، ال 1987 جىلى كسرو چەمپيوناتىندا ءۇشىنشى ورىنعا يە بولدى.
بۇعان دەيىن Kursiv LifeStyle «تەد لاسسو» كومەديالىق سەريالىنىڭ ءتورتىنشى ماۋسىمىنىڭ رەسمي ترەيلەرى جارىققا شىققانىن جازعان بولاتىن.