قىزىلوردا وبلىسىندا نارەستەنىڭ ءومىرىن ساقتاپ قالۋ ءۇشىن توتەنشە جاعدايلار مينيسترلىگىنىڭ ۇشاعى جەدەل كوككە كوتەرىلدى. بۇل تۋرالى 112 قازاقستاندىق قۇتقارۋ قىزمەتى حابارلادى، دەپ جازادى infohub.kz سايتى.
جاڭاقورعاننان كەلگەن نارەستە وبلىس ورتالىعىنداعى اۋرۋحاناعا جەدەل جەتكىزىلدى. بالانى شۇعىل تاسىمالداۋ سەبەبى جاريالانبايدى. دەگەنمەن، ۇشۋ ءساتتى اياقتالعانى جانە قازىرگى ۋاقىتتا بالا دارىگەرلەردىڭ باقىلاۋىندا ەكەنى بەلگىلى.
سانيتارلىق رەيسكە «قازاۆياسپاس» تىكۇشاعى جۇمىلدىرىلعانى اتاپ ءوتىلدى. جول بويى نارەستەنىڭ جاعدايىن مەديسينا قىزمەتكەرلەرى قاداعالاپ وتىردى.
دەنساۋلىق ساقتاۋ مينيسترلىگىنىڭ دەرەكتەرىنە سايكەس، 2026 جىلدىڭ العاشقى سەگىز ايىندا عانا قازاقستاندىق سانيتارلىق اۆياسيا ءبىر جارىم مىڭعا جۋىق رەيس جاسادى. وسى كەزەڭدە ارنايى ۇشاقتار 1 543 اۋىر ناۋقاستى بەيىندى اۋرۋحانالارعا جەدەل جەتكىزدى، ال 4 703 جاعدايدا دارىگەرلەر قاشىقتان كومەك كورسەتتى. ورتاشا ەسەپپەن جىلىنا اۋە جەدەل جاردەمى ەكى مىڭعا جۋىق ۇشۋ جاسايتىنى اتاپ ءوتىلدى.
ەسكە سالايىق، بىلتىر ساناۆياسيا 9 شەتەلدىك رەيس جاساپ، ناۋقاستاردى تۇركيا، گەرمانيا، وڭتۇستىك كورەيا، ۆەتنام، قىرعىزستان جانە مىسىردان ەۆاكۋاسيالادى.
اعىمداعى جىلدىڭ العاشقى سەگىز ايىندا مۇنداي ۇشۋلار سانى ءدال سونداي بولدى — اۋىر ناۋقاستار البانيا، يتاليا، تۇركيا، جۇڭگو، تايلاند، رەسەي جانە وزبەكستاننان اكەلىندى. وسى كۇردەلى باعىتتاردى ۇيىمداستىرۋمەن شۇعىل مەديسينانىڭ ۇلتتىق ۇيلەستىرۋ ورتالىعى اينالىسادى.