قازاقستان پرەزيدەنتى قاسىم-جومارت توقايەۆ بۇۇ-عا «تازا قازاقستان» اكسياسىن نەگىزگە الا وتىرىپ، پلانەتانى جاسىلداندىرۋدىڭ حالىقارالىق كۇنىن تاعايىنداۋدى ۇسىندى. بۇل تۋرالى مەملەكەت باسشىسى ەكولوگيالىق اكسياعا قاتىسۋشىلارعا ارناعان سوزىندە مالىمدەدى، دەپ حابارلايدى infohub.kz سايتى.
توقاەۆتىڭ ايتۋىنشا، قازاقستاننىڭ باستاماسىن بۇۇ باس اسسامبلەياسىنىڭ بارلىق دەرلىك مۇشەسى قولدادى.
پرەزيدەنت جاستارعا ۆولونتەرلىك قىزمەتكە قاتىسقانى ءۇشىن العىس ايتتى. ول 2020 جىلى قازاقستاندا ۆولونتەر جىلى وتكەنىن، كەيىن ەل بۇۇ-عا حالىقارالىق ەرىكتىلەر جىلىن تاعايىنداۋدى ۇسىنعانىن ەسكە سالدى. مەملەكەت باسشىسىنىڭ ايتۋىنشا، بۇل باستامانى دا كوپتەگەن مەملەكەت قولداعان.
«مەن ۆولونتەرلەردى ءاردايىم قولدادىم، ونىڭ ىشىندە بۇۇ-دا جۇمىس ىستەگەن كەزىمدە دە»، — دەدى توقايەۆ. ول ۆولونتەرلىك قىزمەتتىڭ قازاقستان كونستيتۋسياسىندا بەكىتىلگەنىن قوستى.
ازاماتتاردىڭ ەل ومىرىنە قاتىسۋى تۋرالى ايتا كەلە، پرەزيدەنت جاستاردى جاۋاپكەرشىلىكپەن ارەكەت ەتۋگە جانە ءوز سوزدەرى مەن ىستەرىنىڭ سالدارىن ەسكەرۋگە شاقىردى.
«كەيدە ويلانباستان ايتىلعان سوزدەر بەلگىلى ءبىر ارەكەتتەردەن الدەقايدا كوپ زيان كەلتىرۋى مۇمكىن. مۇنى ەشقاشان ۇمىتپاۋ كەرەك»، — دەدى ول.
توقايەۆ سونداي-اق ءادىل، ءقاۋىپسىز، وزىق جانە تازا قازاقستاندى قۇرۋ جۇمىسىن ازاماتتاردىڭ ورتاق مىندەتى دەپ سانايتىنىن اتاپ ءوتتى. ءسوزىنىڭ سوڭىندا ول ۆولونتەرلەرگە العىس ايتىپ، ولارعا تابىس تىلەدى.
بۇعان دەيىن «كۋرسيۆ» توقاەۆتىڭ جاستارمەن جانە ەكواكتيۆيستەرمەن بىرگە پرەزيدەنت ساياباعىندا اعاش وتىرعىزعانىن جازعان. پرەزيدەنت سونداي-اق تازالىقتىڭ ۇلتتىق ستاندارتىن ازىرلەۋدى ۇسىنعان.