قازاقستان پرەزيدەنتى قاسىم-جومارت توقايەۆ VI دۇنيەجۇزىلىك كوشپەندىلەر ويىندارىنىڭ قورىتىندىسى بويىنشا ۇلتتىق قۇرامانى قۇتتىقتادى، دەپ حابارلايدى infohub.kz سايتى.
پرەزيدەنتتىڭ كەڭەسشىسى – ءباسپاسوز حاتشىسى ايبەك سمادياروۆ ءوزىنىڭ Telegram-ارناسىندا مەملەكەت باسشىسى قازاقستاندىق سپورتشىلاردىڭ ونەرىن جوعارى باعالاعانىن اتاپ ءوتتى. قۇتتىقتاۋدا قول جەتكىزىلگەن ناتيجەلەر سپورتشىلاردىڭ جانقيارلىعى، تاباندى ەڭبەگى جانە قايسار جىگەرىنىڭ ارقاسىندا مۇمكىن بولعانى اتاپ كورسەتىلدى.
قاسىم-جومارت توقايەۆ چەمپيوندار مەن جۇلدەگەرلەرگە، باپكەرلەر قۇرامىنا جانە ۇلتتىق سپورت تۇرلەرى بەلسەندى دامىپ كەلە جاتقان ەل رەتىندە قازاقستاننىڭ حالىقارالىق بەدەلىن نىعايتۋعا ۇلەس قوسىپ جۇرگەن بارلىق ماماندارعا العىسىن ءبىلدىردى.
پرەزيدەنت قازاقستاندىق سپورتشىلارعا بولاشاقتا ەڭ بەدەلدى جارىستاردا جاڭا جارقىن جەڭىستەر تىلەدى.
بۇعان دەيىن رەسپۋبليكانىڭ تۋريزم جانە سپورت مينيسترلىگى قۇرامانىڭ قورىتىندى كورسەتكىشتەرىن جاريالاعان بولاتىن: بارلىعى 74 مەدال، ونىڭ ىشىندە 32 التىن، 20 كۇمىس جانە 22 قولا. الايدا بۇل ساندار كوشپەندىلەر ويىندارىنىڭ ۇيىمداستىرۋ كوميتەتى جاريالاعان دەرەكتەرمەن سايكەس كەلمەدى.