قازاقستاندا مادەنيەت قايراتكەرلەرىنە ارنالعان جاڭا مەملەكەتتىك ناگرادالار پايدا بولادى. ءتيىستى شەشىمدى پرەزيدەنت قاسىم-جومارت توقايەۆ قابىلدادى، دەپ حابارلايدى infohub.kz سايتى.
مەملەكەت باسشىسى مەملەكەتتىك ناگرادالار تىزىمىنە «ءشامشى قالداياقوۆ» مەدالى مەن «قازاقستاننىڭ ەڭبەك سىڭىرگەن سۋرەتشىسى» قۇرمەتتى اتاعىن قوستى. بۇل تۋرالى پرەزيدەنتتىڭ كەڭەسشىسى — ءباسپاسوز حاتشىسى ايبەك سمادياروۆ ءوزىنىڭ Telegram-ارناسىندا مالىمدەدى.
«مادەنيەت پەن ونەر — ءبىزدىڭ ۇلتتىق بولمىسىمىزدىڭ بەرىك تىرەگى»، — دەپ جازدى ايبەك سمادياروۆ.
ول سونداي-اق جاڭا كونستيتۋسيادا ۇلتتىق مادەنيەتتى قولداۋ ەڭ جوعارى قۇقىقتىق دەڭگەيدە بەكىتىلگەنىن اتاپ ءوتتى. «سوندىقتان جاڭا كونستيتۋسيادا ۇلتتىق مادەنيەتتى جان-جاقتى قولداۋ مەملەكەتتىڭ ىرگەلى قاعيداتى رەتىندە ەڭ جوعارى قۇقىقتىق دەڭگەيدە بەكىتىلگەن»، — دەلىنگەن ءباسپاسوز حاتشىسىنىڭ جاريالانىمىندا.
جاڭا ناگرادالار ۇلتتىق مادەنيەتتىڭ دامۋىنا ۇلكەن ۇلەس قوسقان قازاقستاندىقتارعا ارنالعان. «بۇل قۇرمەتتى ناگرادالار ۇلتتىق مادەنيەتتىڭ، ونىڭ ىشىندە مۋزىكا مەن بەينەلەۋ ونەرىنىڭ دامۋىنا ۇلكەن ۇلەس قوسقان ازاماتتارعا بەرىلەتىن بولادى»، — دەپ اتاپ ءوتتى ايبەك سمادياروۆ.