قازاقستان پرەزيدەنتى قاسىم-جومارت توقايەۆ ۇستازدار كۇنىنە ارنالعان سالتاناتتى شاراعا قاتىسۋشىلاردى قۇتتىقتاپ، پەداگوگتەردى قولداۋدىڭ جاڭا شارالارى، ولاردىڭ بىلىكتىلىگىن ارتتىرۋ جانە مەكتەپتەرگە جاساندى ينتەللەكتتى ەنگىزۋ تۋرالى ايتىپ بەردى، دەپ حابارلايدى infohub.kz سايتى.
مەملەكەت باسشىسى اتاپ وتكەندەي، بيىل پەداگوگيكالىق ماماندىقتار بويىنشا مەملەكەتتىك گرانتتى 12 مىڭنان استام تۇلەك يەلەندى. «التىن بەلگى» بەلگىسىنىڭ 2 مىڭنان استام يەگەرى پەداگوگيكالىق ماماندىقتار بويىنشا مەملەكەتتىك گرانتقا قول جەتكىزدى. ال ۇستازدىق جولدى تاڭداعان ستۋدەنتتەردىڭ ستيپەندياسى 2،5 ەسە ءوستى.
«جاڭا وقۋ جىلىنىڭ قارساڭىندا وڭىرلەردە 15 مىڭنان استام ءمۇعالىم جۇمىسقا ورنالاستىرىلدى، ولاردىڭ جارتىسى — جاس ماماندار. بۇل مەكتەپتەرگە ءبىلىمدى، جىگەرلى ءارى وزىق ويلى ۇستازداردىڭ جاڭا بۋىنى كەلە جاتقانىن بىلدىرەدى. تاجىريبەلى پەداگوگتەر ءوز جولىندا العاشقى قادامدارىن جاساپ جاتقان جاس ارىپتەستەرىنە جان-جاقتى قولداۋ كورسەتۋى كەرەك. بۇل ناعىز كاسىبي شەبەرلەردى تاربيەلەۋگە مۇمكىندىك بەرىپ، كاسىبي ساباقتاستىق ءداستۇرىن قالىپتاستىرادى. ءبىلىم بەرۋ سالاسىنىڭ كادرلىق الەۋەتىن نىعايتۋدى جالعاستىرۋىمىز قاجەت. اسىرا ايتپاي-اق، مىقتى مەملەكەتتىڭ ىرگەتاسى — بىلىكتى پەداگوگتەر دەپ ايتۋعا بولادى. ال ولاردى دايارلاۋدا جوعارى وقۋ ورىندارىنىڭ الاتىن ورنى ەرەكشە. بولاشاق ماماننىڭ كاسىبي ءبىلىمى مەن داعدىسى ۋنيۆەرسيتەت قابىرعاسىندا قالىپتاسادى. ءعىلىمي-بىلىم بەرۋ سالاسىنداعى حالىقارالىق ىنتىماقتاستىقتى دا جانداندىرۋ ماڭىزدى. شەتەلگە جاساعان ساپارلارىمدا الەمنىڭ جەتەكشى وقۋ ورىندارىمەن سەرىكتەستىكتى نىعايتۋعا ۇنەمى ەرەكشە كوڭىل بولەمىن»، — دەدى قاسىم-جومارت توقايەۆ.
مەملەكەت باسشىسى اتاپ وتكەندەي، جاھاندىق سيفرلىق وركەنيەت پەن ءبىلىم ەكونوميكاسى داۋىرىندە ءومىر ءسۇرىپ، ەڭبەك ەتەتىن ازاماتتار بۋىنىن تاربيەلەۋ — اۋقىمدى مىندەت.
«سوندىقتان مەنىڭ تاپسىرماممەن ورتا ءبىلىم جۇيەسىنە جاساندى ينتەللەكتتى كەزەڭ-كەزەڭىمەن ەنگىزۋ باستالدى. جاڭا تەحنولوگيالار ساۋاتتى پايدالانىلسا، پەداگوگيكالىق قىزمەتتى ايتارلىقتاي جەڭىلدەتىپ، كۇندەلىكتى قاعازباستىلىقتان ارىلتاتىن سەنىمدى قۇرالعا اينالادى. مۇعالىمدەردىڭ تالىمگەرلىككە جانە وقۋشىلارمەن تىكەلەي جۇمىسقا كوبىرەك ۋاقىتى بولۋى ءتيىس. بۇل باعىتتا ماڭىزدى قادام جاسالدى. بيىل قىركۇيەكتە وقۋ-اعارتۋ مينيسترلىگى ءبىلىم بەرۋدە جاساندى ينتەللەكتتى قولدانۋ ستاندارتىن بەكىتتى. وزىق ادىستەمەلەر مەن سيفرلىق پلاتفورمالارعا ەلىمىزدىڭ بارلىق مەكتەبى — مەگاپوليستە مە، الدە شالعاي اۋىلدا ما — قول جەتكىزەدى. ىرگەتاسىمىز مىقتى، جۇمىس دۇرىس باعىتتا باستالدى. PISA-2025 حالىقارالىق زەرتتەۋىنىڭ ناتيجەلەرى كورسەتكەندەي، سيفرلىق دايىندىق دەڭگەيى بويىنشا مەكتەپتەرىمىز ەىدۇ-عا مۇشە مەملەكەتتەردىڭ ورتاشا كورسەتكىشىنەن وزىپ تۇر. وقۋشىلاردىڭ كوگنيتيۆتىك بەيىمدەلۋ يندەكسى دە ورتاشا دەڭگەيدەن جوعارى. ءبىراق بۇل — تەك باستاپقى نۇكتە، ءوزىمىزدى تىنىشتاندىراتىن سەبەپ ەمەس. الدا ءالى اۋقىمدى جۇمىس كۇتىپ تۇر. سوندىقتان قول جەتكەن جەتىستىككە توقمەيىلسۋگە استە بولمايدى»، — دەدى پرەزيدەنت.
ەسكە سالايىق، بۇگىن قاسىم-جومارت توقايەۆ ءوز رەزيدەنسياسىندا وتكەن سالتاناتتى شاراعا قاتىسۋشىلاردى ۇستازدار كۇنىمەن قۇتتىقتادى.