ارالاس جەكپە-جەك (مما) شەبەرى، بريتاندىق توم اسپينالل UFCء-دىڭ اۋىر سالماقتاعى بەلدىگىنەن باس تارتقانىن حابارلادى، دەپ جازادى infohub.kz سايتى.
33 جاستاعى سپورتشى 2025 جىلى امەريكالىق دجون دجونس مانسابىن اياقتاعان سوڭ اۋىر سالماقتاعى (120،2 كگ-عا دەيىن) تولىققاندى چەمپيون اتاندى. بۇعان دەيىن اسپينالل ۋاقىتشا بەلدىكتى يەلەنگەن ەدى.
بريتانيالىق سپورتشى تولىققاندى تيتۋلدى العاش رەت 2025 جىلدىڭ قازانىندا قورعادى. فرانسۋز سيريل گانمەن جەكپە-جەك وتپەي قالدى: كوزىنە ساۋساق تيگەن سوڭ اسپينالل جەكپە-جەكتى جالعاستىرا المادى.
سودان بەرى ول ەمدەلۋدەن ءوتتى، الايدا قالپىنا كەلۋ ۇزاققا سوزىلدى. دەنساۋلىعىنا بايلانىستى بەلدىكتى بوس قالدىردى.
«كوز ماسەلەسىنىڭ جالعاسۋىنا بايلانىستى جەكپە-جەككە قاتىسۋعا مەديسينالىق رۇقسات الا المايمىن. بىرنەشە وتا جاسالىپ، ينفەكسيا دا بولدى، ءبىراق قايتۋ ءۇشىن قولىمنان كەلگەننىڭ ءبارىن جاسادىم»، — دەدى اسپينالل.
ول بۇعان دەيىن جەكپە-جەك كۇنىن كەلىسكەنىن، الايدا قىركۇيەكتە سپاررينگتە كوزىن قايتا جاراقاتتاعانىن اتاپ ءوتتى. ەندى سپورتشى وكتاگونعا قاشان ورالاتىنىن بىلمەيدى.
«ەندى مەن اۋىر سالماقتاعى تيتۋلدان باس تارتۋعا شەشىم قابىلدادىم. UFC-دەن وسى مالىمدەمە جاساۋعا رۇقسات سۇرادىم، ويتكەنى ديۆيزيوندى تەجەگىم كەلمەيدى. مانساپتىڭ توقتاپ قالۋى قانداي بولاتىنىن بىلەمىن جانە باسقا دا سپورتشىلاردىڭ تيتۋل ءۇشىن سىنعا ءتۇسۋىن قالايمىن»، — دەپ جازدى اسپينالل.
سپورتشى وكتاگونعا تەزىرەك ورالۋ ۇستىندە جۇمىسىن جالعاستىرىپ جاتقانىن ايتىپ، «وسىناۋ قورقىنىشتى كەزەڭدە» قولداۋ كورسەتكەندەردىڭ بارىنە العىس ءبىلدىردى.
وسىلايشا، UFCء-دىڭ اۋىر سالماقتاعى تولىققاندى چەمپيونى گان بولادى. فرانسۋز ۋاقىتشا بەلدىكتى ماۋسىمدا برازيليالىق الەكس پەرەيرانى نوكاۋتقا ءتۇسىرىپ جەڭىپ العان ەدى.