جاپونيادا ءوتىپ جاتقان 2026 جىلعى جازعى ازيا ويىندارىندا قازاقستان ۇلتتىق قۇراماسى ساپىندا التىن مەدال جەڭىپ العان بوكسشى تورەحان سابىرحان جەڭىسى تۋرالى پىكىر ءبىلدىردى، دەپ حابارلايدى infohub.kz سايتى.
ۇلتتىق وليمپيادا كوميتەتىنىڭ سايتىندا جاريالانعان سۇحباتىندا چەمپيون بۇل جارىسقا وتە جاقسى دايىندالعانىن جانە التىن مەدالدى ءبىرىنشى بولىپ جەڭىپ العانىنا قۋانىشتى ەكەنىن ايتتى. ونىڭ سوزىنشە، بۇل — الەم چەمپيوناتىنان كەيىنگى ول مەن اعاسىنىڭ ۇلكەن ارمانى ەدى. بۇل جولى ولار بىرگە التىن الا المادى، ءبىراق سپورتشى بولاشاقتا بۇل ماقساتقا مىندەتتى تۇردە جەتەتىنىنە سەنەدى.
سابىرحان فينالداعى قارسىلاسىنا ارنايى دايىندالعانىن، ويتكەنى ازيا چەمپيوناتىنداعى جەڭىلىسى ءۇشىن قارىز قايتارعىسى كەلگەنىن اتاپ ءوتتى. «سوڭىندا ءبارى ءساتتى بولدى، ونىمەن ەسەپ ايىرىسا الدىم. قارسىلاستىڭ بۇعان دەيىنگى جەكپە-جەكتەرىن زەرتتەپ، تاكتيكانى الدىن الا ازىرلەدىك. جوسپارىمىزدى تاماشا ورىنداي الدىم»، — دەدى بوكسشى.
ول سونداي-اق ازيا چەمپيوناتىندا تاكتيكانى دۇرىس تاڭداماي، قارسىلاستىڭ سوققىلارىن وتكىزىپ العانىن ءتۇسىندىردى. بۇل جولى اسىقپاۋعا، قارسىلاسقا شابۋىل جاساۋعا مۇمكىندىك بەرمەۋگە جانە قاشىقتىقتى دۇرىس باقىلاۋعا تىرىستى.
تورەحان العاشقى ەكى راۋندتا باسىم بولعانىن، ءۇشىنشى راۋندتا دا قارقىندى تومەندەتپەي، باتىل ارەكەت ەتكەنىن ناقتىلادى. ول قارسىلاسىن قاجىتىپ، ءوز ماقساتىنا جەتتى. بۇل جولى ول «قازاق بوكسشىلارى قارىز قايتارا الادى» دەگەندى دالەلدەگىسى كەلدى.
«الداعى باستى ماقساتىمىز — استانادا وتەتىن الەم چەمپيوناتى. وسى تۋرنيرگە دايىندالامىز. بۇل جولى اعام ەكەۋمىز ازيا ويىندارىندا التىن الا المادىق. ەندى الەم چەمپيوناتىندا ارمانىمىزدى جۇزەگە اسىرۋعا تىرىسامىز. سونىمەن قاتار، وليمپيادا ويىندارى دا الدا. بۇكىل قازاقستانعا ۇلكەن العىس ايتقىم كەلەدى. جانكۇيەرلەر الەۋمەتتىك جەلىلەردە قولداۋ كورسەتىپ، جىلى لەبىزدەرىن جازىپ جاتىر. قولداۋ ءۇشىن بارلىعىنا كوپ راحمەت»، — دەپ قورىتىندىلادى تورەحان سابىرحان.
ايتا كەتەيىك، تورەحاننىڭ اعاسى — بوكسشى ماحمۇد سابىرحان جازعى ازيا ويىندارىنىڭ قولا مەدالىن جەڭىپ الدى. 55 كەلىگە دەيىنگى سالماق دارەجەسىندەگى جارتىلاي فينالدا ول فيليپپيندىك كارلو پاالاممەن كەزدەستى.