جاپونيادا ءوتىپ جاتقان ازيادا-2026 ويىندارىندا قازاقستاننىڭ ترياتلون قۇراماسى ارالاس ەستافەتادا جەتىنشى بولىپ مارەگە جەتتى. ۇلتتىق كوماندا ساپىندا ديانا ەرجانوۆا، ەگور كرۋپياكوۆ، ايدا كيم جانە ايان بەيسەنبايەۆ سىنعا ءتۇستى، دەپ حابارلايدى infohub.kz سايتى.
قازاقستاندىق تورتتىك قاشىقتىقتى 1 ساعات 31 مينۋت 45 سەكۋندتا باعىندىرىپ، جەڭىمپازداردان 5 مينۋت 51 سەكۋندقا قالىپ قويدى.
التىن مەدالدى جۇڭگو قۇراماسى 1:25:54 ناتيجەسىمەن جەڭىپ الدى. ەكىنشى ورىندى جاپونيا ەنشىلەدى – 1:26:45، قولا گونكونگ كومانداسىنا بۇيىردى – 1:27:25.
ارالاس ەستافەتادا ءتورت قاتىسۋشىنىڭ ءارقايسىسى ءوز كەزەڭىن ءجۇزىپ وتەدى: 300 مەتر ءجۇزۋ، 6،6 شاقىرىم ۆەلوجارىس جانە 2 شاقىرىم جۇگىرۋ. جارىس جاپوندىق گاماگوري قالاسىندا ءوتتى.
ءبىر كۇن بۇرىن ارلان جاناباي ەرلەر اراسىنداعى جەكە ترياتلوندا قولا جۇلدەگەر اتانىپ، قازاقستانعا ازيادا-2026 ويىندارىنداعى العاشقى مەدالىن سىيلادى. ال ديانا ەرجانوۆا ايەلدەر جارىسىندا 17-ورىنعا تۇراقتادى.
جاپونياداعى XX جازعى ازيا ويىندارى رەسمي تۇردە 19 قىركۇيەكتە اشىلدى. 45 ەلدىڭ سپورتشىلارى قاتىساتىن جارىستاردا 460 مەدال جيىنتىعى ساراپقا سالىنادى: 217ء-سى – ەرلەر، 204ء-ى – ايەلدەر، 39-ى – ارالاس رازريادتار اراسىندا. تۋرنيرلەر 41 سپورت ءتۇرىنىڭ 68 ديسيپليناسىندا وتەدى.
ازيادا-2026 ويىندارىندا قازاقستان قۇراماسىنىڭ نامىسىن 559 سپورتشى قورعايدى. كۇنى كەشە قازاقستاندىقتار ءتورت التىن مەدال جەڭىپ العان بولاتىن. ويىندار چەمپيوندارى اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتەشىلەر جولامان بيگابىل مەن سوفيا بەرۋلسەۆا.