الماتىدا وتكەن 30-شى مەرەيتويلىق KIOGE 2026 حالىقارالىق مۇناي-گاز كورمەسى مەن كونفەرەنسياسىنا 58 ەلدەن 500-دەن استام كومپانيا مەن 9 مىڭنان استام قوناق قاتىستى. «تەڭىزشەۆرويل» (تشو) كومپانياسى ءداستۇرلى تۇردە باس دەمەۋشى رەتىندە تانىلدى. قازاقستان رەسپۋبليكاسى ەنەرگەتيكا ۆيسە-مينيسترى ەرلان اقباروۆ مۇناي-گاز جابدىقتارىن شىعارۋدى ۇلعايتىپ، ونى ەلدە ءوندىرۋدى دامىتۋعا شاقىردى، دەپ حابارلايدى infohub.kz سايتى.
KIOGE ساحناسىنان ايتىلعان باستى تاقىرىپتاردىڭ ءبىرى — قازاقستاندا مۇناي-گاز جابدىقتارىن ءوندىرۋدى دامىتۋ بولدى. ەنەرگەتيكا ۆيسە-مينيسترى ەرلان اقباروۆ جاڭا تەحنولوگيالاردى ەنگىزۋ جەرگىلىكتى ءوندىرىس پەن ماشينا جاساۋدى دامىتۋمەن قاتار ءجۇرۋى كەرەكتىگىن اتاپ ءوتتى:
— جاڭا تەحنولوگيالاردى ەنگىزۋمەن قاتار ءوندىرىستى، ماشينا جاساۋدى دامىتىپ، مۇناي-گاز جابدىقتارىن شىعارۋدى ۇلعايتۋ جانە ونى ەلىمىزدە ءوندىرۋدى جەرگىلىكتەندىرۋ، جەرگىلىكتەندىرۋ دەڭگەيىن ارتتىرۋ ماڭىزدى.
تشو قىزمەتىندەگى بۇل باعىت الدەقاشان جۇيەلى تۇردە دامىپ كەلەدى، ال قازاقستاندىق جەتكىزۋشىلەرمەن جۇمىس بىرنەشە جىلعا جوسپارلانعان. تشو جەرگىلىكتى ۇلەستى دامىتۋدىڭ بەسجىلدىق باعدارلاماسىنا قاتىسادى. ونىڭ اياسىندا قازاقستاندىق تاۋارلار، جۇمىستار مەن قىزمەتتەر ۇلەسىن جىل سايىن ۇلعايتۋ، ۇزاق مەرزىمدى كەلىسىمشارتتار جاساسۋ، جاڭا وندىرىستەردى جەرگىلىكتەندىرۋ جانە كومپانيا باسشىلىعىنا بەلگىلەنگەن كورسەتكىشتەرگە قول جەتكىزۋ ءۇشىن KPI ەنگىزۋ قاراستىرىلعان.
1993 جىلدان 2026 جىلدىڭ تامىزىنا دەيىن تشو قازاقستاندىق ۇلەسكە 53،3 ملرد دوللاردان استام قارجى جۇمسادى. وسى كەزەڭدە كومپانيانىڭ قازاقستان ەكونوميكاسىنا قوسقان تىكەلەي قارجىلىق ۇلەسى 220 ملرد دوللاردى قۇرادى. 2025 جىلدىڭ قورىتىندىسى بويىنشا تشو-داعى قازاقستاندىق ۇلەس ساتىپ الۋلارىنىڭ جالپى كولەمى 1 805،9 ملرد دوللاردى، ال ولارداعى ىشكى قۇن ۇلەسى 71%-دى قۇرادى.
تاۋارلاردى ساتىپ الۋدا قازاقستاندىق ۇلەس 2024 جىلعى 7%-دان 2025 جىلى 15%-عا ءوستى. بۇل دەرەكتەردى تشو 2026 جىلعى 4 قىركۇيەكتەگى جاريالانىمىندا كەلتىرىپ، ءوسىمدى ءونىمدى جەرگىلىكتەندىرۋمەن جانە جەرگىلىكتى وندىرۋشىلەرمەن ىنتىماقتاستىقتى كەڭەيتۋمەن بايلانىستىردى.
ايتا كەتۋ كەرەك، جەرگىلىكتى ۇلەستى ۇلعايتۋ باعدارلاماسىنىڭ ءوزى وتاندىق وندىرۋشىلەر ءۇشىن دامۋ درايۆەرىنە اينالدى: ولار جاڭا ساپالىق دەڭگەيگە كوتەرىلۋگە ءماجبۇر. جەتكىزۋشىلەر تشو-نىڭ تەحنيكالىق تالاپتارىنا ساي بولۋى كەرەك. بۇعان تشو-نىڭ جەتكىزۋشىلەردى دامىتۋ باعدارلاماسى كومەكتەسەدى: سالا ماماندارى ءوندىرىس الاڭدارىنا بارىپ، اۋديت جۇرگىزىپ، بىلىكتىلىك تەكسەرەدى جانە كاسىپورىندارعا حالىقارالىق سەرتيفيكاتتار الۋعا كومەكتەسەدى.
سونىمەن قاتار تشو ءۇشىن قازاقستاندىق ۇلەستى دامىتۋ وتاندىق جەتكىزۋشىلەردىڭ جۇمىسىمەن جانە كومپانيادا تەحنيكالىق ءارى باسشىلىق لاۋازىمداردى يەلەنەتىن مامانداردى دايارلاۋمەن تىعىز بايلانىستى. بۇل تۋرالى KIOGE-دە تشو-نىڭ باس ديرەكتورى بيللي لاكوبي ايتتى.
— بۇگىندە تشو قىزمەتكەرلەرىنىڭ 96%-ى قازاقستان ازاماتتارى، ال باسشىلىق لاۋازىمداردىڭ ونىنان توعىزىن قازاقستاندىق ماماندار يەلەنىپ وتىر. ءبىز وتاندىق جەتكىزۋشىلەردى، سيفرلىق شەشىمدەر مەن ادامي كاپيتالدى دامىتۋعا ينۆەستيسيا سالۋدى جالعاستىرامىز.
جالپى العاندا، تشو قىزمەتكەرلەرگە وقۋ مەن حالىقارالىق تاجىريبە الماسۋ مۇمكىندىكتەرىن ۇسىنادى، ونىڭ ىشىندە سيفرلاندىرۋ مەن جاساندى ينتەللەكت سالاسىندا دايارلاۋعا دا جاعداي جاسايدى. 2020 جىلدان بەرى 670-تەن استام قازاقستاندىق قىزمەتكەر بۇرىن شەتەلدىك ماماندار يەلەنگەن ماڭىزدى باسشىلىق جانە تەحنيكالىق لاۋازىمدارعا تاعايىندالدى.