قازاقستان فۋتبول قۇراماسى ۇلتتار ليگاسىنىڭ 2026/27 جىلعى روزىگرىشى قورىتىندىسى بويىنشا كەمىندە C ليگاسىنداعى ورنىن كەپىلدى تۇردە ساقتايدى. ەۋروپالىق فۋتبول قاۋىمداستىقتارى وداعى (ۋەفا) تۋرنير 2028/29 ماۋسىمىنان باستاپ ءتورت ليگادان ءۇش ليگاعا كوشەتىندىكتەن، كوماندالاردىڭ جوعارىلاۋ مەن تومەندەۋ جۇيەسىن وزگەرتتى، دەپ حابارلايدى infohub.kz سايتى.
قازاقستان ءۇشىن باستى وزگەرىس — D ليگاسىنىڭ جويىلۋى. ۋەفا بەكىتكەن وتپەلى جۇيەگە سايكەس، اعىمداعى روزىگرىشتا C ليگاسىنىڭ ءتورت توبىندا ءۇشىنشى جانە ءتورتىنشى ورىن العان بارلىق كوماندا 2028/29 ماۋسىمىندا وسى ديۆيزيوندا قالادى.
بۇعان دەيىنگى رەگلامەنت وزگەشە سحەمانى كوزدەگەن. C ليگاسىندا ءتورتىنشى ورىن العانداردىڭ ىشىندەگى ەڭ ناشار ەكى كوماندا تىكەلەي D ليگاسىنا ءتۇسۋى ءتيىس ەدى، ال ۇزدىك ەكەۋى ءتورتىنشى ديۆيزيون كوماندالارىمەن پلەي-وفف وينايتىن. ەندى بۇل تەتىك جويىلدى.
دجون ۆان’ت سحيپ باستاعان قۇرامامىز C ليگاسىنىڭ 3-توبىندا سلوۆاكيا، فارەر ارالدارى جانە مولدوۆامەن بىرگە ونەر كورسەتەدى. توپ جەڭىمپازى تىكەلەي B ليگاسىنا جولداما الادى.
ەكىنشى ورىن العان كوماندا دا جوعارىلاۋ مۇمكىندىگىن ساقتايدى. C ليگاسى توپتارىنىڭ بارلىق ءتورت كۇمىس جۇلدەگەرى B ليگاسى توپتارىندا سوڭعى ورىن العان ءتورت كوماندامەن پلەي-وفف وينايدى. بۇل قاقتىعىستاردىڭ جەڭىمپازدارى B ليگاسىنا اتتانادى، جەڭىلگەندەر C ليگاسىندا قالادى.
وسىلايشا، قازاقستان ءۇشىن ءۇش سەناري مۇمكىن: ءبىرىنشى ورىن — B ليگاسىنا تىكەلەي جوعارىلاۋ، ەكىنشى ورىن — جوعارىلاۋ ءۇشىن پلەي-وفف، ءۇشىنشى نەمەسە ءتورتىنشى ورىن — C ليگاسىنداعى ورىندى ساقتاۋ.
وزگەرىستەر ۇلتتىق قۇرامالار تۋرنيرلەرىنىڭ اۋقىمدى رەفورماسىنا بايلانىستى. 2028/29 روزىگرىشىنان باستاپ ۇلتتار ليگاسى ءتورت ەمەس، ءۇش ديۆيزيوننان — A، B جانە C — 18 قۇرامادان تۇرادى. قاتىسۋشىلاردىڭ جالپى سانىنا بايلانىستى C ليگاسىنىڭ ءبىر توبىندا جەتى كوماندا بولادى.
2026/27 ماۋسىمىندا D ليگاسىندا ونەر كورسەتكەن التى قۇراما اۆتوماتتى تۇردە C ليگاسىنا اۋىستىرىلادى. ناتيجەسىندە 2028/29 ماۋسىمىنىڭ ءۇشىنشى ديۆيزيونىن B/C پلەي-وففىندا جەڭىلگەن ءتورت كوماندا، اعىمداعى C ليگاسىنىڭ ءۇشىنشى جانە ءتورتىنشى ورىندارىنداعى سەگىز كوماندا جانە جويىلعان D ليگاسىنىڭ التى وكىلى قۇرايدى.
قازاقستان قۇراماسى ءۇشىن ۇلتتار ليگاسىنىڭ جاڭا روزىگرىشى 26 قىركۇيەكتە فارەر ارالدارىمەن سىرت الاڭداعى ماچپەن باستالادى. ءۇش كۇننەن كەيىن كوماندا سلوۆاكيامەن سىرت الاڭدا وينايدى. سودان كەيىن 2 قازاندا مولدوۆامەن جانە 6 قازاندا فارەرلەرمەن ءوز الاڭىنداعى كەزدەسۋلەر وتەدى.
توپتىق كەزەڭنىڭ قورىتىندى ماچتارى قاراشادا وتەدى: 13-ىندە قازاقستان مولدوۆامەن سىرت الاڭدا ويناسا، 16-سىندا سلوۆاكيانى قابىلدايدى.
تۋرنير باستالار الدىندا قۇرامانى العاش رەت دجون ۆان’ت سحيپ دايىندايدى. جاقىن ماچتارعا ارنالعان تۇپكىلىكتى قۇرامعا، اتاپ ايتقاندا، ۇلتتىق كومانداعا قايتا ورالعان باۋىرجان يسلامحان مەن ستاس پوكاتيلوۆ ەندى، ال داستان ساتپايەۆ جاراقاتىنا بايلانىستى جيىندى وتكىزىپ الادى.