ەۋروپالىق فۋتبول قاۋىمداستىقتارى وداعىنىڭ (ۋەفا) اتقارۋ كوميتەتى 2028 جىلعى ۋەفا سۋپەركۋبوگىن وتكىزەتىن ورىن رەتىندە «استانا ارەنانى» تاڭدادى. شەشىم 15 قىركۇيەكتە سالونيكيدە وتكەن اتقارۋ كوميتەتىنىڭ وتىرىسىندا قابىلداندى. قازاقستان تاريحتا العاش رەت وسى كۋبوك ءۇشىن وتەتىن ماچتى قابىلدايدى، دەپ حابارلايدى infohub.kz سايتى.
ايتا كەتەيىك، 2027 جىلى كەزدەسۋ امستەردامداعى «يوحان كرويف ارەنادا» وتەدى، ال ءبىر جىلدان كەيىن كۋبوك قازاقستان استاناسىندا ساراپقا سالىنادى.
سۋپەركۋبوك ءداستۇرلى تۇردە ەۋروپالىق كلۋبتىق تۋرنيرلەردىڭ جاڭا ماۋسىمىن اشادى. ءبىر ماچتا وتكەن ماۋسىمنىڭ چەمپيوندار ليگاسى مەن ەۋروپا ليگاسىنىڭ جەڭىمپازدارى كەزدەسەدى. 2013 جىلدان باستاپ كەزدەسۋ ورنى جىل سايىن اۋىسىپ وتىرادى.
ۋەفا سۋپەركۋبوگى-2028ءدىڭ ناقتى كۇنى ازىرگە جاريالانعان جوق.
ۋەفا اتقارۋ كوميتەتىنىڭ وتىرىسىندا باسقا دا ەۋروپالىق فينالداردىڭ يەلەرى انىقتالدى. چەمپيوندار ليگاسىنىڭ 2028 جىلعى فينالى ميۋنحەندە وتەدى، ال 2029 جىلى شەشۋشى ماچتى بارسەلوناداعى «كامپ نوۋ» قابىلدايدى. ەۋروپا ليگاسىنىڭ فينالدارى وسى جىلدارى سايكەسىنشە بۋحارەست پەن بەلگرادتا وتەدى.
«استانا ارەنا» 2009 جىلى اشىلعان جانە شامامەن 30 مىڭ كورەرمەندى سىيدىرادى. ستاديون جىلجىمالى شاتىرمەن جابدىقتالعان، «استانا» فۋتبول كلۋبىنىڭ ءۇي ارەناسى سانالادى، سونداي-اق قازاقستان قۇراماسىنىڭ ماچتارىن قابىلدايدى. وندا چەمپيوندار ليگاسى مەن ەۋروپا ليگاسىنىڭ كەزدەسۋلەرى بىرنەشە رەت وتكەن.
سوڭعى ۋەفا سۋپەركۋبوگى 2026 جىلدىڭ تامىزىندا زالسبۋرگتە ءوتتى. «پسج» «استون ۆيللانى» 2:1 ەسەبىمەن جەڭىپ، كۋبوكتى ەكىنشى جىل قاتارىنان يەلەندى.