بريفينگتە ۇلتتىق بانك ءتوراعاسى تيمۋر سۇلەيمەنوۆ ازاماتتاردىڭ نەگە تەڭگەگە سەنۋى كەرەكتىگىن ءتۇسىندىردى، دەپ حابارلايدى infohub.kz.
جۋرناليستەر قازاقستاننىڭ دەپوزيتتەرگە كەپىلدىك بەرۋ قورىنىڭ دەرەكتەرىنە نازار اۋدارىپ، حالىقتىڭ ءالى دە 5،9 ترلن تەڭگەنى شەتەل ۆاليۋتاسىندا ساقتاپ وتىرعانىن ايتتى. ولار بۇل سالىمشىلاردىڭ كىم ەكەنىن سۇرادى.
تيمۋر سۇلەيمەنوۆ جەكە تۇلعالاردىڭ دەپوزيتتەرىنىڭ جالپى كولەمى شامامەن 30 ترلن تەڭگەنى قۇرايتىنىن، ال زاڭدى تۇلعالاردىڭ قاراجاتىن قوسقاندا 46–47 ترلن تەڭگەگە جەتەتىنىن اتاپ ءوتتى. «بۇل وتە جاقسى كورسەتكىش، دەپوزيتتەرىمىز ءوسىپ كەلەدى»، — دەدى ول.
ونىڭ ايتۋىنشا، دەپوزيتتەردىڭ دوللارلانۋى تاريحي تومەن دەڭگەيدە — شامامەن 19%. ءالى 3–4 جىل بۇرىن بۇل كورسەتكىش 30–35% بولسا، 5–6 جىل بۇرىن 60% ەدى. «ياعني، تەڭگەگە دەگەن سەنىم جىل سايىن ارتىپ كەلەدى»، — دەپ قوستى ۇلتتىق بانك باسشىسى.
ۆاليۋتالىق سالىمداردى ۇستاۋشىلار تۋرالى سۇراققا سۇلەيمەنوۆ: «نەگىزىنەن بۇل جوعارى تابىستى ازاماتتار، ولاردىڭ تەڭگەدە دە جيناقتارى بار، ارينە، ءبىراق ديۆەرسيفيكاسيا تۇرعىسىنان ولار دوللاردا ساقتاۋدى ءجون كورگەن»، — دەپ ءتۇسىندىردى.
ول سونداي-اق ۇلتتىق بانكتىڭ ولاردى ماجبۇرلەپ تەڭگەگە اۋدارۋ جوسپارى جوق ەكەنىن ايتتى. «مۇنى ىستەۋ قيىن بولادى. قاراڭىزشى، ەگەر ءسىز دوللارعا سالساڭىز، دەپوزيتتەن 1% تابىس تاپتىڭىز. تەڭگەلىك دەپوزيتتەردىڭ مولشەرلەمەسى جوعارى، تيىسىنشە، قاراپايىم قارجىلىق ماتەماتيكا جۇمىس ىستەمەسە، ولار ءوز جيناقتارىنا وزدەرى جاۋاپتى شىعار»، — دەدى سۇلەيمەنوۆ.
رەتتەۋشى باسشىسى دوللاردى 550 تەڭگەدەن ساتىپ العانداردىڭ ءقازىر باعام ايىرماشىلىعىنان دا، تەڭگەلىك سالىمداردان تۇسكەن پايدانى جىبەرىپ الۋدان دا شىعىنعا ۇشىراپ جاتقانىن ەسكە سالدى. «تەڭگەگە سەنۋ كەرەك»، — دەپ تۇيىندەدى ول.