الماتىنىڭ «قايراتىنىڭ» باس باپكەرى رافاەل ۋرازباحتين قازاقستان پرەمەر-ليگاسىنىڭ 27-تۋرىندا «استانادان» جەڭىلگەن سوڭ وتە قىسقا جاۋاپ بەردى، دەپ حابارلايدى infohub.kz سايتى.
«كوپ سويلەمەيمىن. ءبىر ءسوز ايتىپ، كەتەمىن. „شاپيتو“. راقمەت»، — دەدى ۋرازباحتين ويىننان كەيىنگى ءباسپاسوز ءماسليحاتىندا.
الماتىلىقتاردىڭ باپكەرى تورەشىلەر بريگاداسىنىڭ جۇمىسىنا نارازى بولعان سياقتى. كەزدەسۋدىڭ شەشۋشى ەپيزودتارىنىڭ ءبىرى — «قايرات» جارتىلاي قورعاۋشىسى ادىلەت سادىبەكوۆتىڭ 11-مينۋتتا الاڭنان قۋىلۋى.
سادىبەكوۆ ءوز ايىپ الاڭىنىڭ ماڭىندا ستانيسلاۆ باسمانوۆقا قاتىستى ەرەجە بۇزدى. باس تورەشى دەنيس تەۆياشوۆ اۋەلدە ويىنشىعا سارى قاعاز كورسەتتى، الايدا VAR-دى قاراعان سوڭ شەشىمىن وزگەرتىپ، فۋتبولشىنى الاڭنان قۋدى. ءۇش مينۋتتان كەيىن «استانا» ساندىق باسىمدىلىعىن پايدالاندى — رامازان كاريموۆ كارلو بارتولەستىڭ پاسىن باسپەن توعىستىردى. بۇل دوپ ويىنداعى جالعىز گول بولىپ قالدى.
قازاقستاننىڭ قازىرگى چەمپيونى ءۇشىن بۇل جەڭىلىس قاتارىنان ەكىنشىسى — بۇعان دەيىن الماتىلىقتار ءوز الاڭىندا «توبىلعا» 1:4 ەسەبىمەن جول بەرگەن ەدى.
27-تۋر ويىندارىنان كەيىن «ورداباسى» 61 ۇپايمەن قپل كەستەسىندە كوش باستاپ تۇر. ەكىنشى ورىنداعى «قايراتتىڭ» ەنشىسىندە — 57 ۇپاي. «استانا» 48 ۇپايمەن ءۇشىنشى ساتىدا ورنالاسقان.