قازاقستاندا پايدالانۋدان شىققان كولىكتەردى قايتا وڭدەۋ باعدارلاماسىن قايتا باستاۋعا دايىندىق ءجۇرىپ جاتىر، دەپ حابارلايدى infohub.kz سايتى.
ەسكى كولىك يەلەرى ولاردى قايتا وڭدەۋشىلەرگە تاپسىرىپ، قازاقستاندا شىعارىلعان ەكولوگيالىق تازا كولىك ساتىپ الۋعا جەڭىلدىك سەرتيفيكاتىن الا الادى.
ەكولوگيا جانە تابيعي رەسۋرستار مينيسترلىگىندە حابارلاعانداي، باعدارلاما ەكى كەزەڭمەن جۇزەگە اسىرىلادى: قايتا وڭدەۋشى كاسىپورىندارمەن كەلىسىمشارت جاساسۋ جانە كولىك پەن اۋىل شارۋاشىلىعى تەحنيكاسىن قايتا وڭدەۋگە وتىنىمدەردى قابىلداۋ جانە قاراۋ. كولىك قابىلداۋدىڭ ناقتى مەرزىمى ازىرگە بەلگىسىز. الدىمەن «جاسىل دامۋ» قايتا وڭدەۋشىلەردى انىقتاپ، ولارمەن ءتيىستى كەلىسىمشارتتار جاساسۋى كەرەك. ودان كەيىن قابىلداۋ پۋنكتتەرىنىڭ ءتىزىمى پايدا بولادى.
كولىكتى قايتا وڭدەۋگە تاپسىرعاننان كەيىن اۆتوكولىك يەسىنە جەڭىلدىك سەرتيفيكاتى بەرىلەدى. جەڭىلدىك مولشەرىن يندۋستريالاندىرۋ سالاسىنداعى ۋاكىلەتتى مەملەكەتتىك ورگان انىقتايدى. سەرتيفيكات بەرىلگەن كۇننەن باستاپ ءبىر جىل بويى جارامدى بولادى. سونىمەن قاتار، يەسى سەرتيفيكاتتى باسقا ادامعا بەرە الادى — ءبىراق ءۇش رەتتەن كوپ ەمەس. ءبىر كولىك ساتىپ الۋعا ەكى سەرتيفيكاتقا دەيىن، ال اۋىل شارۋاشىلىعى تەحنيكاسىن ساتىپ الۋعا ءتورت سەرتيفيكاتقا دەيىن پايدالانۋعا بولادى. جەڭىلدىك سەرتيفيكاتتارى قايتا وڭدەۋ الىمى قاراجاتى ەسەبىنەن قارجىلاندىرىلادى.
باعدارلاماعا قارا مەتالدى قايتا وڭدەۋمەن اينالىساتىن كاسىپورىندار قاتىسا الادى. بۇل رەتتە قايتا وڭدەۋدەن كەيىنگى قالدىقتاردىڭ ۇلەسى قابىلدانعان كولىكتەر ماسساسىنىڭ 5 پايىزىنان اسپاۋى ءتيىس. سونداي-اق، ءقازىر قايتا وڭدەۋشى كاسىپورىندار جوق وڭىرلەردە قوسىمشا قابىلداۋ پۋنكتتەرىن اشۋ كوزدەلۋدە.
الدىڭعى قايتا وڭدەۋ باعدارلاماسى 2016 جىلدان 2022 جىلدىڭ قاڭتارىنا دەيىن جۇمىس ىستەدى. وسى ۋاقىت ىشىندە قازاقستاندا 219 مىڭعا جۋىق كولىك قۇرالى قابىلداندى، ونىڭ ىشىندە 215،4 مىڭ اۆتوموبيل جانە 3،5 مىڭ اۋىل شارۋاشىلىعى تەحنيكاسى.