ماڭعىستاۋ وبلىسىنداعى ىبىقتى ساي تابيعي ەسكەرتكىشىندە ءۆانداليزمنىڭ كەزەكتى وقيعاسى تىركەلدى. وسى فاكتى بويىنشا قىلمىستىق ءىس قوزعالىپ، كۇدىكتى ۇستالدى، دەپ حابارلايدى infohub.kz سايتى.
NUR.KZ اگەنتتىگى وبلىستىق پوليسياعا سىلتەمە جاساپ حابارلاعانداي، بىرنەشە كۇن بۇرىن 911.aktau Instagram پاراقشاسىندا ىبىقتى ساي شاتقالىنداعى ۆانداليزم ارەكەتىن بەينەلەيتىن ۆيدەو جاريالانعان. كادرلاردا جاس جىگىتتىڭ جارتاسقا تىكەلەي جازۋ جازىپ جاتقانى كورىنەدى.
بۇگىن NUR.KZ تىلشىسىنە ماڭعىستاۋ وبلىستىق پوليسيا دەپارتامەنتىنىڭ ءباسپاسوز قىزمەتى تابيعي نىسان اۋماعىنداعى ۆانداليزم فاكتىسى بويىنشا قىلمىستىق ءىس قوزعالعانىن مالىمدەدى. «34 جاستاعى كۇدىكتى ۇستالدى. تەرگەۋ جالعاسۋدا»، — دەدى پوليسيادا.
وبلىستىق پوليسيا دەپارتامەنتى ۆانداليزم مەن تابيعي نىسانداردى بۇلدىرۋگە جول بەرىلمەيتىنىن ەسكە سالدى. ءاربىر مۇنداي فاكتىگە قاتاڭ قۇقىقتىق باعا بەرىلەدى. كىنالىلەر جاۋاپكەرشىلىككە تارتىلادى، دەپ سەندىردى ءباسپاسوز قىزمەتىندە.
ەسكە سالايىق، بيىل مامىر ايىندا وبلىس پوليسەيلەرى ىبىقتى ساي اۋماعىندا ءوز ەسىمى مەن كولىك ءنومىرى جازىلعان جازۋلار قالدىرعان ەر ادامدى انىقتاعان بولاتىن. سوت وعان 25 تاۋلىك قاماۋ تۇرىندەگى جازا تاعايىندادى.