قازاقستاندىق تەننيسشى يۋليا پۋتينسەۆا (الەمدەگى 84ء-شى راكەتكا) اقش اشىق چەمپيوناتى-2026 ەكىنشى اينالىمىنا جولداما الدى. ول الەمنىڭ 12ء-شى راكەتكاسى شۆەيساريالىق بەليندا بەنچيچتى 4:6، 7:5، 6:3 ەسەبىمەن جەڭدى، دەپ حابارلايدى infohub.kz.
ماچ 2 ساعات 51 مينۋتقا سوزىلدى. ءبىرىنشى سەتتە بەنچيچ باسىم ءتۇستى – 6:4، الايدا ەكىنشى پارتيادا پۋتينسەۆا ويىن بارىسىن وزگەرتە الدى. قازاقستاندىق تەننيسشى ۇزاققا سوزىلعان سەتتىڭ سوڭىندا 7:5 ەسەبىمەن ءوز پايداسىنا شەشىپ، كەزدەسۋدى شەشۋشى پارتياعا اۋىستىردى.
ءۇشىنشى سەتتە پۋتينسەۆا باستامانى قولىنان جىبەرمەدى. ول تاعى دا ماڭىزدى برەيك جاساپ، ماچتى 6:3 ەسەبىمەن اياقتادى. وسىلايشا، ءبىرىنشى اينالىمدا-اق سەيانىي تەننيسشىلەردىڭ ءبىرىن جارىستان شىعاردى.
قازاقستاندىق تەننيسشىنىڭ باستى ارتىقشىلىعى – تۇراقتى پوداچاسى بولدى. پۋتينسەۆا التى ەيس جاسادى، ال بەنچيچ بىردە-بىر ەيس جاساي المادى. شۆەيساريالىق تەننيسشى توعىز قوسارلانعان قاتەلىك جىبەردى، ال ونىڭ قارسىلاسى ءتورت قاتەلىك جىبەردى.
ۆيننەرلەر بويىنشا قارسىلاستار جاقىن بولدى – 37:31، پۋتينسەۆانىڭ پايداسىنا. سونىمەن قاتار، قازاقستاندىق تەننيسشى 37 ءماجبۇرلى قاتەلىك جىبەردى، ال شۆەيساريالىق – 43. ۇپايلاردىڭ جالپى ەسەبى 106:95 بولدى.
ەكىنشى اينالىمدا پۋتينسەۆا كۆاليفيكاسيا ارقىلى نەگىزگى تورعا وتكەن قىتايلىق چجەن سينۆەنمەن (121) وينايدى. ءبىرىنشى راۋندتا چجەن باستاپقى سەتتە ۇتىلىپ قالعانىنا قاراماستان، كريستينا ليۋتوۆانى (125) 4:6، 6:3، 6:1 ەسەبىمەن جەڭدى.
بۇعان دەيىن US Open-2026 ەكىنشى اينالىمىنا قازاقستاندىق ەلەنا رىباكينا مەن الەكساندر بۋبليك تە شىققان بولاتىن. رىباكينا امەريكالىق تەيا ءفروديندى 6:3، 6:2 ەسەبىمەن، ال بۋبليك دجەففري دجون ۆۋلفتى 6:4، 6:2، 3:6، 6:1 ەسەبىمەن جەڭدى. الەكساندر شەۆچەنكو بەس سەتتە دينو پريجميچتەن ۇتىلىپ، جارىستى اياقتادى.
اقش اشىق تەننيس چەمپيوناتى – حارد كورتىندا وتەتىن جىل سايىنعى «ۇلكەن دۋلىعا» ءتۋرنيرى. كۇنتىزبەدەگى ءتورت مەيدجوردىڭ سوڭعىسى.
العاش رەت 1881 جىلدىڭ تامىزىندا وتكەن US Open، ەكىنشى جىل قاتارىنان ءبىر اپتا ەرتە باستالادى، سەبەبى ميكست ءتۋرنيرى باسقا ۋاقىتقا اۋىستىرىلدى. جالپى جۇلدە قورى – $108 ملن – مەيدجورلار اراسىندا رەكوردتىق.
1978 جىلدان بەرى ماچتار نيۋ-يوركتەگى بيللي دجين كينگ اتىنداعى ۇلتتىق تەننيس ورتالىعىندا وتەدى.
ەرلەر اراسىنداعى قازىرگى چەمپيون – يسپانيالىق كارلوس الكاراس (3)، ول وتكەن جىلعى فينالدا ياننيك سيننەردى 6:2، 3:6، 6:1، 6:4 ەسەبىمەن جەڭگەن بولاتىن. ايتا كەتەيىك، الەمنىڭ ءبىرىنشى راكەتكاسى يتاليالىق تەننيسشى تىزە جاراقاتىنا بايلانىستى US Open-2026-دان باس تارتتى.
ايەلدەر اراسىندا 2025 جىلى بەلارۋس ارينا سوبولەنكو جەڭىمپاز اتاندى. شەشۋشى ماچتا ول امەريكالىق اماندا انيسيموۆانى 6:3، 7:6 (7:3) ەسەبىمەن ۇتتى.