InfoHub Logo

مالديۆ ارالدارى ۇكىمەتى يزرايل ازاماتتارىنىڭ ەلگە كىرۋىنە تىيىم سالۋعا شەشىم قابىلدادى. بۇل شەشىم ءيزرايلدىڭ گازا سەكتورىنداعى ۇزاق ۋاقىت بويى جالعاسىپ كەلە جاتقان قاقتىعىستار مەن قىرعىندارعا نارازىلىقتاردىڭ ارتۋىنا بايلانىستى قابىلداندى.

مالديۆ ارالدارى پرەزيدەنتتىك اپپاراتىنىڭ مالىمدەمەسىنە سايكەس، مينيسترلەر كابينەتى يزرايل ءتولقۇجاتى بار ادامداردىڭ ەلگە كىرۋىنە جول بەرمەۋ ءۇشىن زاڭدى وزگەرتۋ تۋرالى شەشىم قابىلدادى. سونىمەن قاتار، زاڭداعى وزگەرىستەردى باقىلاپ، قاداعالايتىن شاعىن كوميسسيا قۇرۋ جوسپارلانۋدا.

مالديۆ ارالدارى پرەزيدەنتى مۇحاممەد مۋيززۋ بىرىككەن ۇلتتار ۇيىمىنىڭ (بۇۇ) تاياۋ شىعىس پالەستينالىق بوسقىندارعا كومەك جانە جۇمىس اگەنتتىگىمەن (UNRWA) قايىرىمدىلىق ناۋقانىن باستاۋعا جانە وسى ماسەلە بويىنشا ارنايى وكىل تاعايىنداۋعا شەشىم قابىلدادى.

مۋيززۋ سونداي-اق پالەستيناعا قولداۋ كورسەتۋ ماقساتىندا ەل كولەمىندە «مالديۆ ارالدارى پالەستينامەن ىنتىماقتاسۋدا» دەگەن ۇرانمەن ۇلتتىق شەرۋ ۇيىمداستىرۋعا دايىندالۋدا.

ءيزرايلدىڭ گازا سەكتورىنا 7 قازان كۇنىنەن بەرى جاساعان شابۋىلدارىندا قازا تاپقان پالەستينالىقتار سانى 37 مىڭعا جەتتى.