شىلدە ايىندا قازاقستاننىڭ باستاپقى جانە قايتالاما نارىقتارىندا تۇرعىن ءۇي باعاسى ايىنا 1%-دان اسپايتىن قالىپتى قارقىنمەن ءوستى، ال جالداۋ باعاسى ءبىر ايدا 1،4%-عا قىمباتتادى، دەپ حابارلايدى infohub.kz.
جالدامالى تۇرعىن ءۇي نارىعىندا سۇرانىس جوعارى كەزەڭ باستالدى. جاڭا وقۋ جىلى قارساڭىندا قازاقستاننىڭ ءىرى قالالارىنا ستۋدەنتتەر كەلەدى، ولاردىڭ كوبى جالدامالى باسپانا ىزدەيدى. جوعارى سۇرانىس ءوز كەزەگىندە جالداۋ باعاسىنىڭ وسۋىنە اكەلەدى.
ۇلتتىق ستاتيستيكا بيۋروسىنىڭ دەرەكتەرىنە سايكەس، شىلدەدە قازاقستاندا جالدامالى تۇرعىن ءۇي ءبىر ايدا ورتا ەسەپپەن 1،4%-عا قىمباتتادى. ءقازىر ول ءبىر جىل بۇرىنعىدان 14،2%-عا قىمبات.
جالداۋ قۇنى ەڭ كوپ استانادا (2،4%)، كوكشەتاۋدا (1،5%) جانە الماتىدا (1،4%) ءوستى. شىمكەنتتە ءوسىم ءبىر ايدا 0،9% قۇرادى. سونىمەن قاتار، ەلىمىزدىڭ بىرنەشە قالاسىندا باعا ءبىر اي بۇرىنعى دەڭگەيدە قالدى: اقتوبە، قاراعاندى، پەتروپاۆل، تاراز جانە تۇركىستاندا.
ءقازىر قازاقستاندا ورتاشا جالداۋ باعاسى شارشى مەترىنە 5 134 تەڭگەنى قۇرايدى. ياعني، شارتتى تۇردە 25 شارشى مەترلىك پاتەر ايىنا شامامەن 128 350 تەڭگە تۇرادى. باعا قالاعا بايلانىستى ايتارلىقتاي وزگەرەدى: الماتىدا جالدامالى تۇرعىن ءۇيدىڭ ءبىر شارشى مەترى ورتا ەسەپپەن 5 961 تەڭگە، استانادا – 5 796 تەڭگە، ال ەڭ تومەن باعا تارازدا تىركەلگەن – شارشى مەترىنە نەبارى 2 515 تەڭگە.
جىلجىمايتىن م ۇلىك ساتىپ الۋعا كەلەتىن بولساق، مۇندا باعانىڭ قالىپتى ءوسۋى بايقالادى. شىلدەدە باستاپقى تۇرعىن ءۇي 0،7%-عا، ال قايتالاما نارىقتاعى باعا نەبارى 0،1%-عا قىمباتتادى. ايلىق ديناميكادا باستاپقى نارىقتاعى ەڭ جوعارى ءوسىم پەتروپاۆل مەن ورالدا تىركەلدى – تيىسىنشە 2،5% جانە 2،2%، ودان كەيىن الماتى – 1،9%. شىمكەنتتە باعا ءبىر ايدا 1%-عا ءوستى، ال استانادا ماۋسىم دەڭگەيىندە قالدى.
قايتالاما نارىقتا ءوسىم كوشباسشىسى قوستاناي بولدى – ءبىر ايدا 3،6%، ودان كەيىن جەزقازعان مەن ورال – تيىسىنشە 3،2% جانە 3%. استانادا باعا ءبىر ايدا 0،6%-عا ءوستى، شىمكەنتتە – 1،9%، ال الماتىدا باعا ءبىر ايدا 0،8%-عا تومەندەدى.
جىلدىق كورسەتكىشتە قازاقستاندا باستاپقى تۇرعىن ءۇي ورتا ەسەپپەن 14،6%-عا، ال قايتالاما نارىقتاعى باعا 9،5%-عا قىمباتتادى. ءقازىر جاڭا پاتەرلەردىڭ ورتاشا باعاسى شارشى مەترىنە 621 900 تەڭگەنى، ال قايتالاما نارىقتا – 630 442 تەڭگەنى قۇرايدى. ەڭ جوعارى باعا الماتىدا: باستاپقى نارىقتا ورتا ەسەپپەن 739 762 تەڭگە، ال قايتالاما نارىقتا – شارشى مەترىنە 743 546 تەڭگە. استانادا باعا ءسال تومەن – تيىسىنشە 739 033 تەڭگە جانە 731 722 تەڭگە.
وسىلايشا، ءقازىر جىلجىمايتىن م ۇلىك نارىعىندا باعا قالىپتى ءوسىپ جاتقانىن، ال جالداۋ باعاسى قارقىن الا باستاعانىن اتاپ وتۋگە بولادى. ءبىراق جالدامالى تۇرعىن ءۇي باعاسىنىڭ ءوسۋ شىڭى، مىسالى، الماتىدا ادەتتە تامىز ايىنىڭ سوڭى مەن قىركۇيەككە كەلەدى. بۇعان دەيىن ساراپشىلار جوعارى ماۋسىمدا سۇرانىس قانا ەمەس، كۇدىكتى ۇسىنىستار سانى دا ارتاتىنىن ەسكەرتكەن بولاتىن، سوندىقتان جالدامالى باسپانا ىزدەپ جۇرگەن قازاقستاندىقتارعا ساق بولۋ كەرەك.