جۇمىس بەرۋشى جالاقىنى ۋاقىتىندا جانە تولىق كولەمدە تولەۋگە مىندەتتى. كەشىكتىرىلگەن ءار كۇن ءۇشىن قىزمەتكەرگە ءوسىماقى تولەنۋى ءتيىس. بۇل تۋرالى قازاقستاننىڭ ەڭبەك جانە حالىقتى الەۋمەتتىك قورعاۋ مينيسترلىگى ەسكە سالىپ، جالاقى تولەنبەگەن جاعدايدا قايدا جۇگىنۋ كەرەكتىگىن ءتۇسىندىردى، دەپ حابارلايدى infohub.kz سايتى.
ەڭبەك مينيسترلىگىنىڭ سايتىندا اتاپ وتىلگەندەي، جۇمىس بەرۋشىنىڭ باستى مىندەتتەرىنىڭ ءبىرى — قىزمەتكەرگە جالاقىنى ۋاقىتىندا جانە تولىق تولەۋ. تولەمنىڭ ناقتى كۇنى ەڭبەك نەمەسە ۇجىمدىق شارتتا بەلگىلەنەدى، ءبىراق ايىنا كەمىندە ءبىر رەت جانە كەلەسى ايدىڭ ءبىرىنشى ونكۇندىگىنەن كەشىكتىرىلمەي جاسالۋى كەرەك.
جالاقى كەشىكتىرىلسە نە ىستەۋ كەرەك؟ مينيسترلىكتىڭ دەرەگىنشە، ەڭ الدىمەن قىزمەتكەر جۇمىس بەرۋشىگە جۇگىنىپ، كەشىگۋ سەبەپتەرىن انىقتاپ، قارىزدى وتەۋدى تالاپ ەتە الادى.
«ماسەلە شەشىلمەسە، قىزمەتكەر جۇمىس بەرۋشىنىڭ ورنالاسقان جەرى بويىنشا ق ر ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىك ەڭبەك ينسپەكسياسى كوميتەتىنىڭ اۋماقتىق دەپارتامەنتىنە جۇگىنۋگە قۇقىلى. ءوتىنىشتى eOtinish جۇيەسى ارقىلى ەلەكتروندى تۇردە دە بەرۋگە بولادى»، — دەدى ۆەدومستۆودا.
وتىنىشكە ەڭبەك قاتىناستارىن جانە جالاقى بويىنشا قارىزدى راستايتىن قۇجاتتاردى قوسا تىركەۋ ۇسىنىلادى. ولار ەڭبەك شارتى، ەسەپ ايىرىسۋ پاراقتارى، بانك ۇزىندىلەرى، بۇيرىقتار جانە باسقا دا راستايتىن ماتەريالدار بولۋى مۇمكىن.
«نەگىزدەر بولعان جاعدايدا مەملەكەتتىك ەڭبەك ينسپەكتورلارى زاڭنامادا بەلگىلەنگەن تارتىپپەن باقىلاۋ ءىس-شارالارىن جۇرگىزەدى. قارىز فاكتىسى راستالسا، جۇمىس بەرۋشىگە بۇزۋشىلىقتى جويۋ، ونىڭ ىشىندە جالاقى بويىنشا قارىزدى وتەۋ تۋرالى ورىندالۋى مىندەتتى نۇسقاما بەرىلەدى. نۇسقامانىڭ ورىندالۋى مەملەكەتتىك ەڭبەك ينسپەكتورلارىنىڭ باقىلاۋىندا بولادى. سونىمەن قاتار جۇمىس بەرۋشى قىزمەتكەرگە جالاقى بويىنشا قارىزدى عانا ەمەس، كەشىكتىرىلگەن ءار كۇنتىزبەلىك كۇن ءۇشىن ءوسىماقىنى دا تولەۋگە مىندەتتى. ونىڭ مولشەرى جالاقى تولەۋ جونىندەگى مىندەتتەمە ورىندالعان كۇنى قولدانىستا بولعان ق ر ۇلتتىق بانكىنىڭ بازالىق مولشەرلەمەسىنىڭ 1،25 ەسەلەنگەن مولشەرىنە قاراي ەسەپتەلەدى»، — دەپ ناقتىلادى ەڭبەك مينيسترلىگى.
جۇمىس بەرۋشىگە قانداي جاۋاپكەرشىلىك قاراستىرىلعان؟ جالاقىنى تولىق كولەمدە جانە بەلگىلەنگەن مەرزىمدە تولەمەگەنى، سونداي-اق جۇمىس بەرۋشىنىڭ كىناسىنەن ءوسىماقىنى ەسەپتەمەگەنى جانە تولەمەگەنى ءۇشىن ق ر اقبتك-نىڭ 87-بابى اكىمشىلىك جاۋاپكەرشىلىكتى كوزدەيدى.
ايىپپۇل مولشەرى: لاۋازىمدى تۇلعالارعا — 30 اەك (129 760 تەڭگە)؛ شاعىن كاسىپكەرلىك سۋبەكتىلەرىنە نەمەسە كوممەرسيالىق ەمەس ۇيىمدارعا — 60 اەك (259 500 تەڭگە)؛ ورتا كاسىپكەرلىك سۋبەكتىلەرىنە — 100 اەك (432 500 تەڭگە)؛ ءىرى كاسىپكەرلىك سۋبەكتىلەرىنە — 150 اەك (648 750 تەڭگە).