جامبىل وبلىسىندا بيولوگيا ءپانىنىڭ ءمۇعالىمى ەكى قىزمەتتەن بىردەن بوساتىلۋىمەن كەلىسپەي، سوتقا جۇگىندى، دەپ حابارلايدى infohub.kz سايتى.
جامبىل اۋداندىق سوتىنىڭ مالىمەتىنشە، 2026 جىلدىڭ ساۋىرىندە جۇمىس بەرۋشىنىڭ بۇيرىعىمەن ايەل وقۋ ءىسى جونىندەگى ديرەكتوردىڭ ورىنباسارى جانە بيولوگيا ءپانىنىڭ ءمۇعالىمى قىزمەتتەرىنەن بوساتىلعان. جۇمىستان شىعارۋعا نەگىز بولعان – اتتەستاتتاردى راسىمدەۋ كەزىندە قىزمەتتىك مىندەتتەرىن تيىسىنشە ورىنداماۋىنا بايلانىستى قىزمەتتىك تەكسەرۋ ماتەريالدارى مەن پوليسيا ورگانىنىڭ ۇسىنىسى.
جۇمىسكەر جۇمىستان شىعارىلۋىمەن كەلىسپەگەن. ونىڭ پىكىرىنشە، جىبەرىلگەن بۇزۋشىلىقتار تۋرالى تۇجىرىمدار جەتكىلىكتى دالەلدەرمەن راستالماعان. ول سونداي-اق اتتەستاتتاردى راسىمدەۋ جونىندەگى كوميسسيانىڭ ءتورايىمى مىندەتى جۇكتەلگەن بۇيرىقپەن ءتيىستى تۇردە تانىستىرىلماعانىن كورسەتكەن. سونىمەن قاتار، تەكسەرۋ بارىسىندا انىقتالعان ءمان-جايلار ونىڭ ديرەكتوردىڭ ورىنباسارى رەتىندەگى جۇمىسىنا قاتىستى بولعان، ال ءدال بيولوگيا ءپانىنىڭ ءمۇعالىمى رەتىندەگى مىندەتتەرىن بۇزۋ انىقتالماعان. ول پەداگوگيكالىق جۇمىسىن جالعاستىرىپ، تارتىپتىك جازالارعا تارتىلماعان، – دەدى سوتتا.
ءىستى قاراۋ بارىسىندا تاراپتار سۋديا-مەدياتوردىڭ قاتىسۋىمەن كەلىسىمگە كەلگەن. كەلىسىم شارتتارىنا سايكەس، مەكتەپ 2026 جىلدىڭ تامىزىنان باستاپ جۇمىسكەردى 8 ساعاتتىق جۇكتەمەمەن بيولوگيا ءپانىنىڭ ءمۇعالىمى قىزمەتىنە قابىلداۋعا، ال 1 قىركۇيەكتەن باستاپ 16 ساعاتتىق تولىق ستاۆكامەن قابىلداۋعا مىندەتتەنگەن. سونداي-اق جۇمىس بەرۋشى بيولوگيا ءپانىنىڭ ءمۇعالىمى قىزمەتىنەن بوساتۋ تۋرالى بۇيرىقتىڭ كۇشىن جويۋعا جانە ءماجبۇرلى بوس جۇرگەن ۋاقىت ءۇشىن جالاقى تولەۋگە مىندەتتەنگەن. سوت كەلىسىمدى بەكىتىپ، ءىس بويىنشا ءىس جۇرگىزۋدى توقتاتقان.