جاپون ينجەنەرلەرى كوكوس مايى نەگىزىندە ەكولوگيالىق اۆياسيالىق وتىن جاساپ شىعاردى. سىناق بارىسىندا ول جوعارى تيىمدىلىك كورسەتكەن، دەپ حابارلايدى infohub.kz.
وساكا قالالىق ۋنيۆەرسيتەتىنىڭ ماماندارى ءداستۇرلى Jet A-1 اۆياسيالىق كەروسينىمەن ارالاستىرۋعا بولاتىن بيولوگيالىق وتىن جاسادى. بۇل قوسپا قوزعالتقىش قۋاتىن تومەندەتپەيدى. قوسپانى بولمە تەمپەراتۋراسىندا جانە قالىپتى قىسىمدا ەرىتكىش ادىسىمەن دايىندايدى، بۇل وندىرىسكە كەتەتىن ەنەرگيا شىعىنىن ازايتادى.
شاعىن تۋربورەاكتيۆتى قوزعالتقىشتا جۇرگىزىلگەن سىناقتار قوسپانىڭ جىلۋ تيىمدىلىگى قاراپايىم وتىن دەڭگەيىندە ەكەنىن كورسەتتى. سونىمەن قاتار، كوكوس قوسپاسى كومىرسۋتەك شىعارىندىلارىن ايتارلىقتاي ازايتادى، ال كومىرقىشقىل گازى مەن ازوت وكسيدتەرىنىڭ كولەمىن ارتتىرمايدى. جىلۋ سىيىمدىلىعى تومەن بولعاندىقتان، بيولوگيالىق وتىننىڭ شىعىنى ءسال جوعارى، ءبىراق تۋربينالاردىڭ جۇمىسى ناشارلامايدى.
ءوندىرىس ءۇشىن وڭتۇستىك-شىعىس ازيادا ساتۋعا جارامسىز دەپ تانىلعان كوكوس جاڭعاقتارىن پايدالانۋ ۇسىنىلادى. بۇل جاڭا پلانتاسيالار ءۇشىن ورمانداردى كەسۋدى بولدىرماۋعا مۇمكىندىك بەرەدى. بولاشاقتا زەرتتەۋشىلەر 100 پايىز بيولوگيالىق وتىننان تۇراتىن قوسپالاردى سىناپ، ولاردىڭ ساقتاۋ كەزىندەگى توزىمدىلىگىن زەرتتەۋدى جوسپارلاپ وتىر.