حالىقارالىق زەرتتەۋشىلەر توبى Naja تۇقىمداس كوبرا ۋىنىڭ كارديوتوكسيندەرىنەن ميكروبقا قارسى پەپتيدتەردى ىزدەۋ ءۇشىن جاساندى ينتەللەكتتى قولداندى. جۇمىس ناتيجەلەرى NPJ Drug Discovery عىلىمي جۋرنالىندا جاريالاندى، دەپ حابارلايدى infohub.kz سايتى.
زەرتتەۋ اۆتورلارى — برۋنو مەندەس، جواو ريكاردو المەيدا، ۆالەريا كاستەللەتتو، يەن حەملي جانە گرەم باررەتت. كومپيۋتەرلىك تالداۋ مەن ماشينالىق وقىتۋ الگوريتمدەرىنىڭ كومەگىمەن ولار اقۋىز دەرەكقورلارىن زەرتتەپ، 14 ىقتيمال پەپتيدتىك كانديداتتى انىقتادى.
زەرتحانالىق سىناقتار بارىسىندا حيميالىق سينتەزدەلگەن ۇلگىلەر باكتەريا مەمبرانالارىن بۇزۋ قابىلەتى مەن ادام ەريتروسيتتەرىنە ۋىتتىلىعى تەكسەرىلدى. ەڭ ءتيىمدىسى CTX-p5 دەپ اتالاتىن پەپتيد بولدى: ول گرامتەرىس جانە گراموڭ باكتەريالاردىڭ قابىقشالارىنىڭ تۇتاستىعىن بۇزىپ، دەپولياريزاسيا مەن وتكىزگىشتىكتىڭ ارتۋىن تۋدىردى. سونىمەن قاتار، تەكسەرىلگەن مولەكۋلالاردىڭ كوپشىلىگى ادام قان جاسۋشالارىنا گەموليتيكالىق ۋىتتىلىقتىڭ تومەن دەڭگەيىن كورسەتتى.
جۇمىس اۆتورلارى الىنعان زاتتاردىڭ قازىرگى مينيمالدى تەجەۋ كونسەنتراسيالارى دايىن ءدارى رەتىندە تىكەلەي قولدانۋ ءۇشىن ءالى دە جوعارى ەكەنىن اتاپ ءوتتى. الايدا جۇرگىزىلگەن ەكسپەريمەنت ءداستۇرلى تەراپياعا ءتوزىمدى پاتوگەندەرمەن كۇرەسۋگە قابىلەتتى انتيبيوتيكتەردىڭ جاڭا تۇرلەرىن ازىرلەۋ ءۇشىن جاساندى ينتەللەكت پەن جىلان ۋلارىن قولدانۋ تۇجىرىمداماسىنىڭ ساتتىلىگىن دالەلدەدى.