قازاقستاننىڭ ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ ۇكىمەت وتىرىسىندا سيفرلىق جۇمىسپەن قامتۋ قىزمەتىنىڭ جاڭا مۇمكىندىكتەرى تۋرالى ايتتى، دەپ حابارلايدى infohub.kz سايتى.
ەنگىزىلەتىن مودەلدىڭ باستى ماقساتى — ازاماتتاردى جۇمىسپەن قامتۋدى پرواكتيۆتى قامتاماسىز ەتۋگە كوشۋ. نەگىزگى قاعيدات: ادام جۇمىس ىزدەمەيدى، كەرىسىنشە جۇمىس ادامدى ءوزى تابادى. بۇرىن ازامات پورتالداعى بوس جۇمىس ورىندارىن ءوزى قاراپ، مانساپ ورتالىعىنا جۇگىنۋگە ءماجبۇر بولسا، ەندى جۇيە جۇمىس بەرۋشىلەردىڭ قاجەتتىلىكتەرىنە قاراي جۇمىسقا ورنالاسۋعا مۇقتاج ادامداردى ءوزى انىقتايدى. ءتيىستى حابارلامالار eGov جانە Enbek.kz ءموبيلدى قوسىمشالارى ارقىلى، سونداي-اق 1414 نومىرىنەن SMS تۇرىندە جىبەرىلەدى.
جاساندى ينتەللەكت ايماق ىشىندە دە، ودان تىس جەرلەردە دە، ونىڭ ىشىندە جۇمىسشى ماماندىقتارى بويىنشا جەكە بوس جۇمىس ورىندارىن تاڭدايدى. سونىمەن قاتار، ازاماتتارعا وقۋدان ءوتۋ، قايتا دايارلاۋ نەمەسە كوشى-قون باعدارلامالارىنا قاتىسۋ مۇمكىندىكتەرى ۇسىنىلادى. ناتيجەسىندە اركىم تۇراقتى جۇمىسقا ورنالاسقانعا دەيىن سۇيەمەلدەنەدى.
شىلدە ايىندا قىزمەت پاۆلودار وبلىسىندا ىسكە قوسىلدى: جۇمىسقا ورنالاسۋ ماسەلەلەرى بويىنشا 39 مىڭ SMS حابارلاما جىبەرىلدى، وسى كەزەڭدە ايماقتا 962 ادام جۇمىس تاپتى. قىركۇيەكتە قىزمەتتى ماڭعىستاۋ وبلىسىندا ەنگىزۋ جوسپارلانسا، جىل سوڭىنا دەيىن ەلدىڭ بارلىق 20 وڭىرىندە ەنگىزىلەدى. ۇقساس قىزمەت Aitu ءموبيلدى قوسىمشاسى ارقىلى قولجەتىمدى بولادى، وندا جاساندى ينتەللەكت كومەكشىسى قولايلى بوس جۇمىس ورىندارى مەن وقۋ كۋرستارىن تاڭدايدى.
اعىمداعى جىلدىڭ سوڭىنا دەيىن جاساندى ينتەللەكت تاعى بەس باعىتتا ەنگىزىلەدى. ءۇشىنشى توقساندا جاساندى ينتەللەكت قانداس مارتەبەسىن بەرۋ نەمەسە ۇزارتۋ، جۇمىسپەن قامتۋعا جاردەمدەسۋ شارالارىنا جولداما بەرۋ، كاسىبي ەڭبەككە قابىلەتتىلىگىن جوعالتۋ دارەجەسىن انىقتاۋ (مەديسينالىق دەرەكتەردى تالداۋ جانە جاراقات سالدارىن باعالاۋ)، سونداي-اق زەينەتاقى تاعايىنداۋ كەزىندە — قۇجاتتاردى تانۋ جانە جالعاندىقتى بولدىرماۋ ءۇشىن قولدانىلاتىن بولادى.
ءتورتىنشى توقساندا سكانەرلەنگەن ەڭبەك كىتاپشالارىن تانۋ، جاسى بويىنشا زەينەتاقى تولەمدەرىن تاعايىنداۋ كەزىندە ۇسىنىستار قالىپتاستىرۋ ءۇشىن سيفرلىق مودەلدەر ازىرلەۋ، سونداي-اق ەل كاسىپورىندارىنداعى ەڭبەك قاۋىپسىزدىگى مەن ەڭبەك جاعدايلارى سالاسىنداعى ەڭبەك تاۋەكەلدەرىن انىقتاۋ ءۇشىن جاساندى ينتەللەكتكە نەگىزدەلگەن تالداۋدى ەنگىزۋ جوسپارلانۋدا.