وڭتۇستىك افريكادا بوكس چەمپيونى زولاني تەتەنىڭ ولتىرىلۋىنە بايلانىستى ءتورت ادام ۇستالدى. بۇل تۋرالى infohub.kz حابارلايدى.
38 جاستاعى تەتە جۇما كۇنى ءۇيىنىڭ الدىندا قاستاندىقپەن ءولتىرىلدى. ونىمەن بىرگە بولعان جاس ايەل دە وققا ۇشىپ، اۋرۋحاناعا جات قىزىلدى.
ۇستالعانداردىڭ ءبىرى — 22 جاستاعى ەر ادام سەنبىدە قاماۋعا الىنىپ، دۇيسەنبىدە العاشقى سوت وتىرىسىنا قاتىسادى. وعان كىسى ءولتىرۋ جانە كىسى ولتىرۋگە وقتالۋ ايىپتارى تاعىلۋى مۇمكىن.
تەتە 2017-2019 جىلدارى WBO بوكس بەلبەۋىن، ال 2014 جىلى IBF سۋپەر جەڭىل سالماقتاعى تيتۋلىن يەلەنگەن. كەيىن ول ءتورت جىلعا ديسكۆاليفيكاسيالانعان بولاتىن، مەرزىمى بيىل شىلدەدە اياقتالدى.
جەكسەنبىدە ۇستالعان قالعان كۇدىكتىلەر سەيسەنبىدە سوتقا كەلەدى. ولاردىڭ ەكەۋىنە قارۋ مەن ءوق-دارىنى زاڭسىز ساقتاۋ ايىبى تاعىلىپ وتىر. ولارعا كىسى ءولتىرۋ جانە كىسى ولتىرۋگە وقتالۋ ايىپتارىنىڭ تاعىلۋى ازىرگە بەلگىسىز.
رەسمي دەرەكتەرگە سايكەس، تەتە ءۇيىنىڭ قاقپاسى اشىلۋىن كۇتىپ، كولىگىندە وتىرعان كەزدە ەكى بەتپەردەلى قارۋلى ادام كولىكتەن شىعىپ، وعان جانە 27 جاستاعى جولاۋشى ايەلگە وق جاۋدىرعان.
ەكى دۇركىن الەم چەمپيونىنىڭ قازاسىنا بايلانىستى كوپتەگەن كوڭىل ايتۋلار ايتىلۋدا. وڭتۇستىك افريكانىڭ سپورت ءمينيسترى گايتون ماككەنزي: «وڭتۇستىك افريكا ءوزىنىڭ ەڭ ۇزدىك بوكسشىلارىنىڭ بىرىنەن ايىرىلدى»، — دەدى.
بۇرىنعى سپورت ءمينيسترى فيكيلە مبالۋلا دا تەتەگە قۇرمەت كورسەتىپ، «بوكس سپورتىنا وراسان زور ۇلەس قوسقان ۇلى وڭتۇستىكافريكالىقتىڭ» قازاسىنا وكىنىش ءبىلدىردى.
تەتە 2015 جىلى ليۆەرپۋلدىك پول باتلەردى جەڭگەن بولاتىن. ول ۇلىبريتانيادا سەگىز رەت ونەر كورسەتكەن.
سونداي-اق ول تيتۋلدىق جەكپە-جەكتەگى ەڭ جىلدام نوكاۋت بويىنشا گيننەسس رەكوردىنا يە. 2017 جىلى ول سيبونيسو گونيانى 11 سەكۋندتا نوكاۋتقا جىبەرگەن.
تەتە سوڭعى رەت 2022 جىلدىڭ شىلدەسىندە لوندوندا بريتانيالىق دجەيسون كاننينگەمدى نوكاۋتپەن جەڭگەن، ءبىراق كەيىن دوپينگ-تەستىنەن وتپەگەندىكتەن ناتيجە جويىلدى. ونىڭ سىناماسىندا انابوليكالىق ستەرويد ستانوزولول تابىلىپ، ۇلىبريتانيانىڭ دوپينگكە قارسى اگەنتتىگى ونى ديسكۆاليفيكاسيالاعان.
قايتىس بولعاننان كەيىن مەنەدجەرى ملا تەنگيمفەنە ونىڭ ديسكۆاليفيكاسيا مەرزىمى اياقتالعان سوڭ رينگكە قايتا ورالۋعا دايىندالىپ جاتقانىن راستادى.
تەتە 34 جەكپە-جەكتىڭ 29-ىندا جەڭىسكە جەتكەن، ءتورت رەت جەڭىلىپ، ءبىر جەكپە-جەگى جويىلعان.