InfoHub Logo

Aqmola oblysynda estafeta kezinde kóz jumǵan 15 jastaǵy mektep oqýshysynyń ólimine qatysty Kókshetaý qalalyq bilim bólimi júrgizgen qyzmettik tekseristiń qorytyndysy shyqty.

Eske sala keteıik, osyǵan deıin, 2019 jylǵy mamyrdyń 17-de saǵat 12:30-da Býrabaıdaǵy «Zvezdnyı» balalardy saýyqtyrý ortalyǵynda «Alaý» oblystyq áskerı-sporttyq oıyndar estafetasy kezinde 15 jastaǵy mektep oqýshysy kóz jumǵan edi.

«Estafeta kezinde Kókshetaý qalalyq №4 orta mektebiniń 9-synyp oqýshysy márege jetpeı esinen tanyp qulady. 2003 jylǵy jasóspirimge birden alǵashqy medısınalyq kómek kórsetildi. Keıin Shýchınsk qalasyndaǵy aýdandyq aýrýhanaǵa jetkizildi. Aýrýhanada es jımastan 13:01-de qaıtys boldy», - degen bolatyn oblystyq bilim basqarmasynyń baspasóz qyzmeti.

Artynsha osy oqıǵaǵa baılanysty Kókshetaý qalalyq bilim bólimi qyzmettik tekseris júrgizdi. Búgin oblystyq bilim basqarmasy sol qyzmettik tekseristiń qorytyndysyn shyǵardy.

«Atalǵan faktige baılanysty qalalyq bilim bólimi tekseris júrgizdi. Onyń barysynda alǵashqy áskerı daıyndyq muǵalimi  M.D.Ismaǵambetov óziniń qyzmettik jaǵdaıyn paıdalanyp, mektep dırektory men ákimshiligin habardar etpeı, jarysqa qatysýshy Aleksandr Novıchıhındy óz erkimen Dıas Taıjanovqa aýystyrǵany anyqtaldy. Sonymen qatar, jalǵan qujattar ázirlep, osy jarystarǵa D.Taıjanovty qatystyrǵan. Bilim bóliminiń 2019 jylǵy 13 mamyrdaǵy №199 buıryǵyna qosymshada Taıjanov Dıas bolmaǵan. Qyzmettik tergeý qorytyndysy boıynsha ákimshilik tarapynan álsiz baqylaý úshin mektep dırektory B.Haseınovaǵa «qatań sógis», dırektordyń oqý-tárbıe jumysy jónindegi orynbasary  J.Kýbrınaǵa «sógis» tártiptik jazasy jarıalandy. QR Eńbek kodeksiniń 52-baby 1-tarmaǵy 14-tarmaqshasyna sáıkes jáne pedagogıkalyq etıka erejelerin saqtamaýǵa baılanysty alǵashqy áskerı daıyndyq pániniń muǵalimi M.Ismaǵambetovpen eńbek sharty buzyldy», - dep atap ótti vedomstvonyń baspasóz qyzmeti.

Aıta keteıik, qazirgi kezde osy oqıǵaǵa baılanysty ishki ister organdary tarapynan da tergeý júrip jatyr.

---