InfoHub Logo

Oqý-aǵartý vıse-mınıstri Ǵanı Beısembaev vedomstvoda ótken apparat jınalysynda 2026 jylǵa deıin mektepterdegi tapshylyq 1 mln 117 myń 900 oryndy quraýy múmkin ekenin aıtty.

«Úsh aýysymdy mektepterdiń joǵary úlesiniń saqtalý sebepterin anyqtaý jáne boljamdy kontıngentti eskere otyryp, 2026 jylǵa deıin oqýshy oryndarynyń tapshylyǵyn odan ári esepteý úshin ekstrapolásıa ádisi qoldanyldy. Bul ádis ótken kezeńderde baıqalǵan úrdister men boljamdy dınamıkany eskere otyryp bolashaq kórsetkishterdi anyqtaýǵa negizdelgen.

Osylaısha, kontıngenttiń jyl saıynǵy ósiminiń boljamy negizinde 2026 jyly bilim alýshylar sany 4,3 mln oqýshyny quraıdy. Atap aıtsaq, 2022 jyly – 3,6 mln, 2023 jyly – 3,8 mln, 2024 jyly – 4 mln jáne 2025 jyly 4,3 mln balaǵa jetedi.

Bala týý, ýrbanızasıa, óńirishilik jáne óńiraralyq kóshi-qon, sondaı-aq 1950 jylǵa deıin salynǵan mektep ǵımarattarynyń tozýy kórsetkishterin eskere otyryp, 2026 jylǵa deıin oqýshy oryndarynyń boljamdy tapshylyǵy 1 117,9 myńdy quraıdy», - dep boljam nátıjelerimen bólisti vıse-mınıstr.

Buǵan deıin Ǵanı Beısembaev mektepterdi salý kezinde oryn alatyn basty máselelerdi ataǵan edi. Onyń aıtýynsha, 300-den 1200-ge deıin oryn sany bar tıptik mektep qurylysyna memleket 7,6 mlrd teńgege deıin jumsaıdy. Sonyń ishinde, mektepti jabdyqtarmen jaraqtandyrý smetalyq qunynyń shamamen 4-10 paıyzyn ǵana quraıdy. Iaǵnı, 500 mln teńgege deıin jumsalady. Nátıjesinde, mektep tapsyrylǵan soń ony qajetti pándik kabınettermen, kompúterlik synyptarmen, oqý zerthanalarymen, sheberhanalarmen jaraqtandyrý úshin qosymsha 1 mlrd teńgege qajet bolady.

---