InfoHub Logo

Qurmetti halaıyq, búgin bizdiń qýanyshymyzdy bólisýge kelip otyrǵan aǵaıyn, týys, baýyrlar!

Qurmetti quda-qudaǵı! Sózimniń birinshi bóligin sizderge arnaǵym keledi!

«Bizdiń ekken dánimiz pisti. Úıimdi jaryq etken nurym, júregimdi terbegen jyrym, ana – jumyrtqasyn jaryp, aq qusqa aınalyp, kórshi báıterekke uıa salmaqqa ushyp barady dep oılaımyn.

Álemde áke úshin óziniń qyzynan asqan sulý qyz joq. Meniń qyzym ózim úshin – «Taý Baıan dep jańǵyrady, ózen Baıan jep aǵady, orman-toǵaı Baıan dep shýlaıdy» dep jar salatyn Qozy Kórpeshtiń Baıanynan da asqan sulý. Er Tarǵynǵa tar jerden jol taýyp bergen Aqjúnis arýdan da ótken aqyldy! Áıtkenmen, Qoblandynyń Qyz Qurtqa baptap –jaratqan qyryq kúndik kemdigi bar Taıbýryl –tulpary syndy ómir-tájirıbesi áli jetkiliksiz, az. Endigi kemdigin óziń toltyr, qurmetti qud-qudaǵıym!

Qanattyǵa qaqtyrmaı, tumsyqtyǵa shoqyttyrmaı, kúnge kúıdirmeı, sýyqqa tońdyrmaı boı jetkizdim, ósirdim. Endigi jerde Eńlikgúlimniń súıegi – meniki, eti – sizdiki. Menen - ótti, Sizge- jetti. Qyz bala - ózge eldiń amanaty. Ózge el – Siz úshin asyrap-jetkergen kózimniń nury, baýyr eti balamnyń endigi jerdegi taǵdyryn sizge amanattaımyn, qurmetti quda-qudaǵı!

Budan bylaıǵy jerde obaldy men saýaby da, qyzyǵy men rahaty da Sizdiń bosaǵańyzda, qurmetti quda-qudaǵı!

Meniń mápelep ósirgen appaq gúl-qyzym! Endigi jerdegi tilegim saǵan arnalady. «Qyz bala – qonaq» degen osy eken. Maǵan ózińe sóz arnaý óte aýyr, qyzym! Seni muńaıtqym kelmeıdi, qýantqym keledi. Óıtkeni, óz qalaýyńmen teń qosaǵyńdy taýyp, baqytty saparǵa shyǵyp barsyń. Men osyny oılap qýanamyn! Búgin jota basyna qatar tigilgen qos shybyqtarym – kúıeý balam ekeýińe bar aıtar tilegim; qaraǵan el qyzyǵatyn, qoıý kóleńkesi el ıgiligine asatyn jemisti báıterekke aınalyńdar. Erteń appaq jelegi jelbirep kelin bolǵaly turǵan qyzym, saǵan aıtarym; sen de qudaǵılyqqa jetip, tilek aıt! Bastaryńdy – bult, baýyryńdy muz shalmasyn!
Baqytty bolyńdar!

Qydyr ata bolsyn balam joldasyń,
Kókiregiń eldiń kúıin tolǵasyn.
Atqan tańyń baǵyńdy ashyp árdaıym,
Ata babań árýaǵy qoldasyn!

Ashyq bolsyn aspanyń men aınalań,
Ardaqtasyn aq oramal baılaǵan.
Tań sáride tilek tile Táńirden,
Tartynbasyn qolyńdy endi jaı balam!
Áýmın!

---