Bir óleńi - bir eldiń murasyndaı,
Jyr jaza almaı júrmin men Rasýldaı.
Rasýldaı...
Baǵym da júr ashylmaı,
Qusbeginiń qolyndaǵy lashyndaı.
Tanylmasa syrymen, qyrymenen,
Tanylmaı-aq ketsinshi quryp óleń!
Rasýldaı men-daǵy jyrlar jazsam,
Rasýldy tonaǵan ury der eń...
Rasýldaı bola alman!
Jyrym bólek!
Ózimniń únim kerek, tilim kerek.
Ózgeni de ózindeı súıgen elim,
Óz aqynyn tabady túbinde kep.
Men - taýlyqpyn -
Qyrannyń balapany.
Maǵan-daǵy taýymnyń tańy atady.
Qarapaıym qaltqysyz jyrlarymdy
Qajetine óz halqym jaratady.
Men ázirge bola almaı Rasýldaı,
Baǵym, janym - barlyǵy júr ashylmaı.
Alynady tomaǵam, ketem ushyp,
Qusbegiden qutylǵan lashyndaı.

---