Bir áńgime qozǵashy aýyl jaıly,
Budan artyq rahat tabylmaıdy.
Buldyrasyn ótken kún saǵymdaı bir,
Bir áńgime qozǵashy aýyl jaıly.
Qar da iligip qalǵan-dy taý basyna,
Muz tońdy ma bulaqtyń jambasyna?
Sýyq kelip, sýyr da jatqan shyǵar,
Qamdap alyp azyǵyn qambasyna.
Tórt túlikten tógilgen shalqar ándi,
Uzatqan-dy, jaılaý da tarńaǵan-dy.
Eski jurtty timiskip, qorqaý álgi
Qajalap ta júrgen-di qańqalardy.
Saǵynyshtaı sarǵaıyp jandy ma kúz,
Sary sháıi jamylyp aldy ma túz?
Qýraılaryn syńsytyp sybyzǵydaı,
Qańbaǵy ushyp, qańyrap qaldy ma ańyz?
Áńgimele taýyn da, dalasyn da,
Qyrqasyn da, saıyn da, salasyn da.
Aqboz úıdiń túndigin jelpildetip,
Qondy ma kep qoıly aýyl Qarasýǵa?
Qarasýǵa qosylyp tuna baryp,
Jatqan bolar irgede bulaq aǵyp?
Aryp kelip, toıynyp qaıtqan bolar,
Top tyrnalar aspanǵa syna qaǵyp?

---