Bir án bar búgingi urpaq estimegen,
(Sonaý bir soǵys jyly estigen em)
Áredik, eldeqalaı esime alsam,
Qos basy, qoıý qara keshti kórem.
Shar tastar, shalǵyndy saı «Qaraǵaıly»,
Shýly ózen shomyldyrǵan shaǵala - Aıdy.
Jótelip bulttar kóship ótetuǵyn,
Jetektep jeteginde qara qaıǵy.
Jel tynǵan, japyraq ta silkinbegen,
Taýǵa kep tún uııtyn kilkildegen.
Ár júrekti sol bir án mazalaıtyn,
Ár kómeıde sol bir án búlkildegen.
Qos basynda qaýymnyń bárisi de,
Qosylatyn jasy da, kárisi de,
Sińir tirsek bizder de shyrqaýshy edik,
Túsinbesten sol ánniń mánisine.
Kúndizgi zor beınettiń túni kelip,
Ár kesh saıyn án tyńdap júrip edik.
Kóz uıqyǵa ketkenshe sol bir ánnen
Saı-sala turatuǵyn kúńirenip.
Júrektiń shydyraýynda qozdaıtuǵyn,
Shybyny bar keýdeni qozǵaıtuǵyn.
Qaýym aıtqan sol ándi estigende,
Botaly ingen boryqta bozdaıtuǵyn.
Bir án bar búgingi urpaq estimegen,
(Sonaý bir soǵys jyly estigen em).
Sol bir án kómeıime keptelgende,
Ómir deıtin kerýen, kóshti kórem.

---