Erinshek
Erinshekten – salaqtyq,
Salaqtyqtan – nadandyq.
Birinen-biri týady,
Joǵalar súıtip adamdyq.

Erinshek taza júre almas,
Kiri-qońyn jýa almas.
Hareket joq, ǵylym joq,
Óz boıynan uıalmas.

Júreıin deseń, turǵyzap,
Tósekke moıyn burǵyzar.
«Analar da júr ǵoı»,– dep,
Bireýdi mysal qylǵyzar.

Turaıyn deseń, jatqyzar,
Býyndy súıtip qatqyzar.
Oryndy iske kirgizbeı,
Ne bolsa sony shatqyzar.

«Men emes pe sabyryń,
Janyńa tynysh tamyryń,
Asyqpa‚ – dep aldaıdy,–
Qazýly ma‚ – dep‚ – qabyryń?»

«Qudaıdyń‚ – deıdi‚ – kúni kóp,
Asyqqan istiń mini kóp.
Az ǵana rahat qylsańshy,
Istersiń erteń muny‚ – dep.

– Osymen-aq júre cal‚
Myna bir jerge-aq kire sal.
Bir jyrymyń úzilse,
Qanjyǵańmen ile sal.

Taramys qaıda, biz qaıda‚
Asyǵystan ne paıda.
Tigip ala qoıarsyń,
Biz tabylǵan bir jaıda».

Oraza, namaz keledi,
Oǵan da aqyl beredi.
Keshirer dep qudaıyń,
Rahymeti kúshti dep edi.

Shaqyrmaı-aq qoı azandy,
Keshedi Qudaı jazańdy.
Jaı oqysań bolmaı ma,
Ketire bermeı mazańdy.

Sonymen qalsań aldanyp,
Umtylmasań qamdanyp,
Jalqaýdyń quly bolǵanyń,
Jatpaq úshin jaldanyp.

Sharýa da kóp basyńda,
Kóndirý kerek jasyńda.
Qylaıyn deseń haraket,
Erinshek otyr qasynda.

Jáne aıtady aqyldy,
Qysyp qoıar taqymdy:
«Tilimdi alsań, tek otyr,
Meniń sózim maqul-dy.

Jas basyńnan aptyqpa,
Kire berme boqtyqqa.
Ómir ózi-aq beredi,
Taǵdyrǵa qarsy soqtyqpa.

Qulaq qoısań sózime,
Paıda aıtamyn ózińe.
Arqalatpa beınetti
Qyzyq kórer kezińe.

Beınetke janyń shydaı ma,
Osy sózim unaı ma?
Pendesin ashtan óltirmes,
Qarsy bolma qudaıǵa».

Munyń sózi maqul dep,
Aıtqany durys aqyl dep,
Hareketsiz ketkeniń,
Jaı izdermin aqyr dep.

Bul sózdi uǵyp jas ketti,
Iship alyp mas ketti.
Bar kerekten aırylyp,
Erinshek degen qas ketti.

Erinshektiń qaqpany,
Kórinbeı kózge jatqany.
Bireý oǵan ilinse,
Ony qudaı atqany.

Is qyldyrmas eseli –
Eń bilimniń keseli.
Kirse, boıdan shyǵý joq,
Kún saıyn óser bes eli.

Tóbeni súıtip tesedi,
Ornyqqan saıyn ósedi.
Ǵıbadat joq, óner joq,
Báriniń jolyn kesedi.

Daýlassań jeldeı esedi,
Ózi aıtyp, ózi sheshedi.
Yıir bolǵan kisiler,
Jan tynyshtyq desedi.

Jan tynyshtyq bul emes,
Jan deneniń quly emes.
Óziń baılap beresiń,
Jan jumysy ol emes.


You Might Also Like

Jańalyqtar

Jarnama