InfoHub Logo

QR Bilim jáne ǵylym mınıstri Kúlásh Shámshıdınova bilim qyzmetkerleriniń jalaqysyn kóterý sharalary týraly aıtty. Atalǵan tapsyrmany QR Tuńǵysh Prezıdenti bergen bolatyn. Oǵan sáıkes, jalaqysy tómen búdjettik sala qyzmetkerleriniń jalaqysy 30 paıyzǵa kóterilýi kerek.

Mınıstrdiń aıtýynsha, QR Eńbek jáne xalyqty áleýmettik qorǵaý mınıstrligi jańa tarıftik koeffısentti bekitti. Al QR Bilim jáne ǵylym mınıstrligi esepteý jumystaryn bastap ketti.

"Osy oraıda aıta ketetin másele, jalpy búdjet salasyndaǵy jalaqysy tómen qyzmetkerlerdiń aılyǵyn kóbeıtýge arnalǵan qarjynyń 75 prosenti bilim salasyna bólinip otyr. Jalaqy 1 maýsymnan bastap kóteriletin bolady. Negizgi personaldyń aılyǵy kóteriledi. Olardyń ishinde eńbek ótilin endi ǵana bastaǵan jas muǵalimder, kolej ustazdary, psıxologtar, balabaqshalardyń jetekshileri, tárbıeshileri men kómekshileri, sonymen qatar, qosymsha bilim berý júıesinde jumys isteıtin qyzmetkerler bar", - dedi K.Shámshıdınova Úkimet úıinde ótken baspasóz máslıxatynda.

Onyń sózine qaraǵanda, kómekshi personaldyń jalaqysy da artady. Olar - eden jýýshylar, kúzetshiler, ot jaǵýshylar, santexnıkter men elektrıkter. "Sosyn basqarýshy personal bar. Olar - mektep dırektorlary men olardyń orynbasarlary", - dep atap kórsetti K.Shámshıdınova.

---