InfoHub Logo

QR Bilim jáne ǵylym mınıstri Kúlásh Shámshıdınova jalaqysy tómen búdjettik sala qyzmetkerleriniń jalaqysy qalaı artatynyn túsindirdi.

Úkimet úıinde ótken baspasóz máslıxatynda K.Shámshıdınova arnaıy slaıdtardy kórsetip, naqty mysaldardy da keltirdi. Máselen, qalada jumys isteıtin áleýmettik pedagog, kitapxanashy men tárbıeshi 2-3 eńbek ótilimen 55 869 teńge alsa, 1 maýsymnyń bastap olardyń aılyǵy 70 859 teńgege deıin artady. Al aýylda 69 837 teńgeden 88 573-ge deıin kóteriledi. Sol sıaqty tárbıeshiniń kómekshisi qalada 54 117 teńge alsa, jalaqy kóterilgennen keıin atalǵan soma 63 904 teńge bolady. Aýylda osy sanattaǵy mamandardyń aılyǵy 67 713 teńgeden 79 880-ge deıin ulǵaıady. Budan bólek, qalada pedagog-psıxologtyń aılyǵy 81 565, al aýylda 101 957 teńge bolady. Qazir 2-3 jyldyq eńbek ótili bar jas muǵalimder qalada 55 480 teńge alsa, aldaǵy ýaqytta olardyń aılyǵy 66 382 teńgege deıin kóteriledi. Al aýylda jas muǵalimderdiń jalaqysy 82 976 teńge bolady.

Aıta keteıik, búgingi brıfıńte bilim mınıstri arnaıy tarıftik koeffısenttiń bekitilgenin málimdedi. Al QR Bilim jáne ǵylym mınıstrligi esepteý jumystaryn bastap ketti.

«Osy oraıda aıta ketetin másele, jalpy búdjet salasyndaǵy jalaqysy tómen qyzmetkerlerdiń aılyǵyn kóbeıtýge arnalǵan qarjynyń 75 prosenti bilim salasyna bólinip otyr. Jalaqy 1 maýsymnan bastap kóteriletin bolady. Negizgi personaldyń aılyǵy kóteriledi. Olardyń ishinde eńbek ótilin endi ǵana bastaǵan jas muǵalimder, kolej ustazdary, psıxologtar, balabaqshalardyń jetekshileri, tárbıeshileri men kómekshileri, sonymen qatar, qosymsha bilim berý júıesinde jumys isteıtin qyzmetkerler bar», - dedi K.Shámshıdınova Úkimet úıinde ótken baspasóz máslıxatynda.

Onyń sózine qaraǵanda, kómekshi personaldyń jalaqysy da artady. Olar - eden jýýshylar, kúzetshiler, ot jaǵýshylar, santexnıkter men elektrıkter.

«Sosyn basqarýshy personal bar. Olar - mektep dırektorlary men olardyń orynbasarlary», - dep atap kórsetti K.Shámshıdınova. 

---