InfoHub Logo

Myń jasaǵan shahar ásem Almatyda 20 ǵasyrdyń ortasynan beri qaraı merzimdi basylymdar jaryq kórip turdy. Solaı bola tura, el astanasy bolǵan Almatyda qazaq tilinde taraıtyn gazet joqtyń qasy bolatyn. Qoǵamǵa ult tilinde jaryq kóretin basylymnyń qajettigi kórinip turǵan dál sol kezeńde Almaty qalasynda  1988 jyly «Almaty aqshamy» gazeti óz jumysyn bastady. Gazetke belgili jýrnalıs Islamǵalı Beısebaev redaktorlyq etti. 

«Almaty aqshamy» gazetiniń ereksheligi qalanyń turmys-tirshiligine arnalǵan alǵashqy basylym bolýynda edi. Kúni búgingi kúnge deıin elimizdiń birneshe oblysynda shyǵarylyp kele jatqan gazet Almatymen birge bite-qaınasyp, jyl saıyn jańa mazmunmen baıyp, jańaryp-jasaryp keledi.

Kez kelgen basylym sol zamandaǵy jaı-kúılerdi baıandaıtyny belgili. «Almaty aqshamynda da» kótergen alǵashqy máseleleri men qozǵaǵan taqyryptary jer men dil, til men ulttyq murat, rýhanıat pen ulttyq múdde tóńireginde boldy. Táýelsizdik myqtap turyp ornap, el damýdyń dańǵyl jolyna túsken kezden bastap, basylymnyń maqalalary da ózgerip, kóńil kónshıtin, kókeıdi qýanysh kerneıtin taqyryptarǵa aýysty. «Qala tynysy», «Qala qarbalas», «Joldaý» syndy aıdarlary shyndyqtyń týyn jelbiretip, jańalyqtyń jarshysyna aınaldy.

«Almaty aqshamynyń» «Mádenı mura», «Tulǵa» aıdarynyń 21.04.2022 jylǵy shyqqan sanynda «Kósemsóz zergeri» atty Ǵabıt Músirepovke arnalǵan maqala jarıalandy. Ulymyzdy ulyqtaǵan ult emespiz be!? Qazaqtyń halyq jazýshysyna arnalǵan maqalany kórgende kókiregi oıaý oqyrman oqymaı ótpedi. Maqala jazýshynyń ómir jolymen bastalady. Kelesi mátindi «Qara qaryndash» dep, synshynyń óz esteligimen jalǵastyrady. Proza salasyndaǵy Ǵ.Músirepovtiń týyndylaryna toqtalyp, synshynyń «Talǵampazdyǵyn» sóz etedi.

Maqaladan jazýshynyń kópshilik bile bermeıtin qasıeti ańshylyqtan bólek, súıikti isi-taıaq joný ekenin bilemiz. Júrgen jerinde ózine unaǵan myqty aǵashtardy jonyp alyp, ádemi taıaqtar jasap shyǵarady eken. Jazýshynyń jasaǵan sol taıaqtary qazirgi ýaqytta murajaıda saqtalǵan. Ǵabıt Músirepov murajaıyndaǵy taǵy bir erekshe dúnıe - jazýshynyń dosy Ǵabıden Mustafın syılaǵan aǵash oryndyq. Onyń eki qulaqshasy bar, ony jazsa oryndyq bolady, jınasa qolǵa ustaıtyn taıaq bolady. Jazýshynyń aǵash ónerine qyzyqqany onyń eshkimge uqsamaıtyn biregeıligin kórsetedi.

«Álemniń ádebıet kitaphanasyna» Ǵ.Músirepovtiń enografıalyq áńgimesi engen. Kósemsóz zergeri Ǵ.Músirepovke arnalǵan maqala tyń aqparattarmen oqyrmanyna usynylyp, jas urpaqtyń rýhanı baılyǵynyń molaıyp, jazýshynyń ádebıetke engen úlesin taǵy da bir aıqyndap berdi. 

«Almaty aqshamy» gazeti tyń dúnıelerdi pash etip, oqyrmany odan saıyn kóbeıe túsip, Almatymen birge máńgi jasaı beretinine senimimiz mol.

Jýanqan Aıtolqyn

---