InfoHub Logo

عىلىم جانە جوعارى ءبىلىم ءمينيسترى ساياسات نۇربەك 2037 جىلدان باستاپ مەملەكەت جوعارى ءبىلىم گرانتتارىن توقتاتىنى تۋرالى اقپاراتتىڭ قاتە ەكەنىن ءمالىم ەتتى.

«ول جالعان ەمەس، ءبىراق دۇرىس ەمەس اقپارات. وزدەرىڭىزگە ءمالىم، پرەزيدەنت جولداۋىندا مىنانداي ءبىر ۇلكەن تاپسىرما بەردى. كەلەسى جىلدان باستاپ «كەلەشەك» دەگەن جۇيەگە كوشۋ كەرەك. بۇل وتباسىلارعا بالاسىنا 5 جاستان باستاپ اقىرىنداپ اقشا جيناۋعا مۇمكىندىك بەرەدى. ونىڭ ۇستىنە ءبىزدىڭ مەملەكەتتەن سىياقى تۇسەدى. بۇل – جوعارى ءبىلىمنىڭ قولجەتىمدىلىگىن ساقتاپ قالۋ ءۇشىن جوسپارلانعان شارا. 2037 جىلدان باستاپ گرانتتار توقتامايدى. ءبىراق گرانتتاردىڭ سانى ازايۋى مۇمكىن. نەگە دەسەڭىز، اقىرىنداپ، ءبىر 15-20 جىلدا اقشا جيناقتالادى. ءار وتباسى ءبىر ايلىق ەسەپتىك كورسەتكىش ءقازىر 3460 تەڭگە دەسەك، سونى اي سايىن وسى شوتقا سالىپ تۇرسا، مەملەكەت تاراپىنان ونىڭ ۇستىنە تاعى سىياقىلاردى قوسادى – جيناقتاۋشى، ساقتاندىرۋشى كومپانيالاردىڭ سىياقىسى بار. بالا 17-18 جاسقا جەتكەندە 12،5 ملن تەڭگە جينالادى. ءقازىر ءبىز بۇكىل ەسەپتى پىسىقتاپ جاتىرمىز. ياعني، بالا جوعارى وقۋ ورنىنا تۇسكەندە سەميادا كەپىلدى تۇردە اقشا جينالىپ قالادى. ال بالا گرانتقا تۇسكەندە سول اقشانى باسپانا الۋعا جۇمساۋعا بولادى»، - دەدى مينيستر.

ۆەدومستۆو باسشىسى گرانتتار سانى بىرتىندەپ ازايعانىمەن، جوعارى بىلىمگە مەملەكەتتىك تاپسىرىس توقتامايتىنىن ەسكەرتتى.

«بۇل ءبىر كۇندە عانا بولمايدى. 15-20 جىل بويى اقشا جينالعاندا گرانتتاردىڭ سانى ازايۋى مۇمكىن. گرانتقا دەگەن مەملەكەتتىك تاپسىرىس قالادى. بۇل –مەملەكەتىمىزدىڭ نەگىزگى فۋنكسياسى. جوعارى بىلىمگە قولجەتىمدىلىكتى ساقتاپ قالامىز. ول جاعىنان ەشقانداي وزگەرىس بولمايدى. ءبىراق گرانتتاردىڭ سانى وزگەرۋى مۇمكىن، ازايۋى مۇمكىن»، - دەدى ساياسات نۇربەك.

---