پالاۋ جاساۋدىڭ جولدارى وتە كوپ. وزىڭىزگە ىڭعايلىسىن تاڭداپ الارسىز.

كادىمگى پالاۋ

قۇرامى:

400 گرامم ەت، 3 ۇيەمە اس قاسىق توڭ ماي، 3 پياز، ىرىلەۋ 5-6 ءسابىز، 1 كەسە كۇرىش، 1 كەسە كەپكەن ورىك نەمەسە الما، تۇز بەن بۇرىش تاتىمىنا قاراي.

دايىنداۋ پروسەسى:

شاعىنداۋ قازان وتقا قويىلادى دا، ماي سالىپ قىزدىرىلادى. ماي قايناي باستاعاندا ساقينالاپ، ىرىلەۋ ەتىپ تۋرالعان پياز سالىنىپ قۋىرىلادى دا، كەپسەرمەن ءسۇزىپ الىنادى. سودان سوڭ ءار كىسىگە ءبىر كەسەكتەن كەلەتىندەي ەتىپ، ءىرى-ىرى ەت كەسەكتەرى سىرتى قىزارعانشا قۋىرىلادى. ۇستىنە ۇزىنشالاپ كەسىلگەن ءسابىز قوسىلادى، تۇزدالىپ، بۇرىشتالادى. 1 كيلوگرامم كۇرىشكە 1،5 ليتر ەسەبىمەن سۋ قۇيىلىپ ودان ءارى اسىلادى. سودان كەيىن الدىن الا كۇرمەگىنەن، بوگدە زاتتاردان تازارتىلىپ، جۋىلعان كۇرىش سالىنادى دا، جان-جاعى ىسىرىلىپ ورتاسىنا ۇيىلەدى. ۇستىنەن تۇبىنە دەيىن بىرنەشە جەردەن تەسىلەدى. سوندا سۇيىق ماي بىركەلكى تارايتىن بولادى. بەتىنە ۇساقتاپ تۋرالعان كەپكەن ورىك نەمەسە كەپكەن الما سەبىلەدى. قازاننىڭ قاقپاعى مىقتاپ جابىلىپ، استىنداعى وتى باسەڭدەتىلەدى. پالاۋ ءپىسىپ جاتقاندا ونى ارالاستىرۋعا بولمايدى.

پىسكەننەن كەيىن قازان وتتان الىنىپ، قالىڭ ماتامەن 5-10 مينۋت ورالىپ تاستالادى. وسى ۋاقىتتان كەيىن ارالاستىرىلىپ، دوڭگەلەك نە سوپاق اسەم ىدىستارعا سالىنىپ، داستارقانعا اكەلىنەدى.

توي پالاۋى

قۇرامى:

1 ادامعا ەسەپتەگەندە 200 گرامم كۇرىش، 2 ءسابىز، 200 گرامم ەت، 2 اس قاسىق ماقتا مايى، كىشىرەكتەۋ جارتى پياز، 1 شىمشىم قارا بۇرىش، 1 شىمشىم تۇز.

دايىنداۋ پروسەسى:

اتاۋىنان-اق كورىنىپ تۇرعانداي بۇل پالاۋ ۇلكەن تويلاردا، جيىنداردا، مەرەكەلەردە دايىندالادى.

كۇرىش كۇرمەگىنەن، بوگدە زاتتاردان تازارتىلادى. 3-4 قايتارا جۋىلادى. ءسويتىپ سۋعا سالىنىپ قويىلادى.

ءسابىز ىرىلەۋ ەتىپ، ۇزىنشالاپ كەسىلەدى. پياز ساقينالاپ تۋرالادى. ەت سۇيەگىمەن قوسا 0،5-1 كيلوگرامدىق كەسەكتەرگە بولىنەدى.

ۇلكەن شوگەن وتقا قويىلىپ، ماقتا مايى قۇيىلادى دا ابدەن قايناتىلادى. وعان ەت كەسەكتەرى سالىنىپ، ابدەن قىزارعانشا قۋىرىلادى. سودان سوڭ پياز سالىنادى. ول ەتپەن بىرگە جۇمسارعانشا قۋىرىلادى. پياز قۋىرىلىپ، جۇمسارعاننان كەيىن تەگىس ءبىر قابات ەتىلىپ ءسابىز سالىنادى. تۇزدالىپ، بۇرىشتالادى. قازانداعى ونىمدەردىڭ بەتىمەن-بەت ەتىپ سۋ قۇيىلادى دا، وتتى باسىڭقىراپ قويىپ، ءبىر ساعات اسىلادى.

الدىن الا بورتتىرىلگەن كۇرىشتىڭ سۋى توگىلىن، ءسابىزدىڭ ۇستىنە سالىنادى. كۇرىش جارىلۋىنا قاجەت ازداعان ىستىق سۋ قۇيىلادى. قازانعا كۇرىش سالىنىسىمەن وتتىڭ شوعى الىپ تاستالىنادى دا، مايدالاپ جارىلعان اعاش وتىن سالىپ، شالقىتا جاعىلادى. ەگەر قازان قاتتى قايناپ كەتىپ، بۋ مول شىعا باستاسا، قازاننىڭ قاقپاعى اشىلادى دا كۇرىش كەپسەرمەن بىرنەشە رەت ارالاستىرىلادى. سودان سوڭ جان-جاعى جيناستىرىلىپ، ورتاسىنا ۇيىلەدى. بىرنەشە جەردەن ۇستىنەن تۇبىنە دەيىن تەسىلەدى. قاقپاعى قايتا جابىلىپ، استىنداعى وت سوندىرىلەدى نەمەسە قازاندى جەرگە قويادى. ءسويتىپ 20-40 مينۋت ءوز بۋىنا پىسىرىلەدى.

پىسكەننەن كەيىن ەتى الىنىپ، ۇساقتاپ تۋرالادى. پالاۋ بىرنەشە رەت اۋدارىستىرىلىپ ۇلكەن جايپاق تاباقتارعا سالىنادى. جان-جاعى ىسىرىلىپ، ورتاسى ۇيىلەدى. بەتى كەپسەرمەن تەگىستەلەدى دە، ۇستىنە ماناعى تۋرالعان ەت سالىنىپ داستارقانعا اكەلىنەدى.

مەيرام پالاۋى

قۇرامى:

1 كيلوگرامم كۇرىش، 800 گرامم ەت، 3 ۇيەمە اس قاسىق توڭ ماي، 6-7 ءىرى ءسابىز، 3-4 پياز، 3-4 سارىمساق، 2 ايۆا، 150 گرامم نۋحات اسبۇرشاعى، 2 اس قاسىق مەيىز، 50 گرامم انار ءدانى، 2 جۇمىرتقا، تۇز بەن بۇرىش تاتىمىنا قاراي.

دايىنداۋ پروسەسى:

قازانداعى قايناپ جاتقان مايعا ساقينالاپ كەسىلگەن پياز، سوداڭ سوڭ تۋرالعان ەت سالىنىپ، ابدەن قىزارعانشا قۋىرىلادى دا ءۇستىن ءتورتبۇرىشتاپ تۋرالعان ءسابىز سالىنادى. ول ەتپەن قوسىپ جارتىلاي، ياعني شالا قۋىرىلادى. ودان كەيىن الدىن الا سۋعا سالىپ جىبىتىلگەن نۋحات اسبۇرشاعى مەن ايۆا تىلىكتەرى، تۇتاس سارىمساق سالىنىپ، ۇستىنە سۋ قۇيىلادى دا، وتتى باسىڭقىراپ قويىپ، اسبۇرشاق جۇمسارعانشا قايناتىلادى.

پالاۋدى اسبۇرشاق پىسپەي تۇرىپ تۇزداۋعا دا، بۇرىشتاۋعا دا بولمايدى. ايتپەسە ونى ءپىسىرۋ قيىنعا سوعادى.

قازانداعى بارلىق ءونىم دايىن بولعاننان كەيىن كۇرمەگى مەن بوگدە زاتتاردان ارىلتىلعان، جۋىلىپ، تازارتىلعان كۇرىش سالىنىپ، ۇستىنە سۋ قۇيىلادى دا، وتتى كۇشەيتىپ قويىپ پىسىرىلەدى. سالدەن سوڭ ىرىكتەلىپ جاقسىلاپ جۋىلعان مەيىز سالىنىپ، قازاننىڭ قاقپاعى ورامالمەن ورالىپ جابىلادى دا، 15-20 مينۋت بۇقتىرىلادى.

بولەك ىدىسقا جۇمىرتقا مەن ءسابىز پىسىرىلەدى دە دوڭگەلەكتەپ، جۇلدىزشالاپ، ءۇشبۇرىشتاپ، پياز كورزينا سەكىلدەندىرىپ، اسەمدەپ كەسىلەدى.

پىسقەن پالاۋ بىر-ەكى رەت ارالاستىرىلادى دا ايۆا مەن سارىمساق الىنىپ، تاباققا ءۇيىپ سالىنادى. پالاۋدىڭ جيەكتەرى الگى ورنەكتەپ كەسىلگەن كوكونىستەرمەن اسەمدەلەدى. كورزينا سەكىلدەندىرىپ كەسىلگەن پياز انار دانىمەن تولتىرىلىپ، كورنەكتىلەۋ تۇسىنا قويىلادى. پالاۋمەن بىرگە پىسكەن ماناعى ايۆا مەن سارىمساق تا اسەمدەۋ ءۇشىن پايدالانىلادى.

وسىلاي دايىندالعان پالاۋ ءتىل ءۇيىرىپ قانا قويمايدى، سونىمەن بىرگە داستارقاننىڭ ءسانىن دە كەلتىرەدى.

قۋىرما پالاۋ

قۇرامى:

1 كيلوگرامم كۇرىش، 500 گرامم قوي ەتى، 250 گرامم قۇيرىق ماي، ىرىلەۋ 5-6 ءتۇيىر ءسابىز، 4-5 پياز، تۇز، بۇرىش، زيرە تاتىمىنا قاراي، 2 اس قاسىق ۇساقتالعان كوك جۋا.

دايىنداۋ ءتاسىلى:

قۇيرىق ماي ۇساقتاپ تۋرالادى دا وتقا قويىپ قىزدىرىلعان قازانعا شىجعىرىلادى. شىجىعى ءسۇزىپ الىنادى. قايناپ جاتقان مايعا ساقينالاپ كەسىلگەن پياز قىزارعانشا قۋىرىلادى. سودان سوڭ كەسەكتەپ تۋرالعان ەت سالىنادى. ول دا پيازبەن قوسىلىپ ابدەن قىزارعانشا قۋىرىلادى. ۇزىنشالاپ كەسىلگەن ءسابىز قازانعا ەت قۋىرىلعاننان كەيىن عانا سالىنادى. ءسويتىپ اۋىق-اۋىق ارالاستىرىلا وتىرىپ، ودان ءارى قۋىرىلا بەرەدى. ءسابىز شالا پىسكەننەن كەيىن ۇستىنە سۋ قۇيىلادى. وعان قازان ىشىندەگى ونىمدەر تولىق باتىپ جاتۋعا ءتيىس. وت باسەڭدەتىلىپ، قازان ءبىر قايناتىلادى. قايناعاننان كەيىن بۇرىشتالىپ، ازداپ زيرە سالىنادى. قازاننىڭ قاقپاعى جابىلىپ، تاعى ءبىر قايناعان سوڭ تۇزدالادى دا، وتتى باسىپ قويىپ، 50-80 مينۋت بۇقتىرىلادى. ەگەر كوبىرەك بۋلانىپ كەتسە، قايناعان سۋمەن ەسەلەۋگە بولادى. ەت پەن كوكونىس دايىن بولدى-اۋ دەگەن كەزدە الدىن الا كۇرمەگى تەرىلىپ، جۋىلعان كۇرشى تەگىستەلىپ سالىنادى. وتتى كۇشەيتىپ، كۇرىش قاباتىن بوگىپ جاتاتىنداي دەڭگەيدە سۋ قۇيىلادى. ءسويتىپ قاتتى قايناتىلادى.

سۋى تارتىلماي تۇرعاندا تۇزىن كورىپ، تاتىماسا قوسىمشا سالۋعا بولادى. سودان سوڭ سۋى تارتىلعان بويدا وتى وشىرىلەدى دە، پالاۋدىڭ جان-جاعى ورتاسىنا قاراي ۇيىلەدى. ءار جەرىنەن تۇبىنە دەيىن جەتكىزىلىپ تەسىلەدى. قازاننىڭ قاقپاعى جاقسىلاپ جابىلىپ، قالىڭ ماتامەن ورالىپ تاستالادى.

پالاۋ باسىلاتىن كۇرىشتىڭ سورتىنا بايلانىستى ورتا ەسەپپەن 20-25 مينۋتتان كەيىن ورالعان ماتا الىنىپ، قازاننىڭ قاقپاعى اشىلادى دا، مۇقيات ارالاستىرىلىپ، تاباققا ۇيمەلەپ سالىنادى. بەتىنە ەتى، سۇيەكتەرى سالىنادى. داستارقانعا اكەلەردە ۇساقتاپ تۋرالعان كوك جۋا سەبىلەدى.

قازىلى پالاۋ

قۇرامى:

500 گرامم كۇرىش، 250 گرامم قازى، 250 گرامم توڭماي، 4-5 ءسابىز، 2-3 پياز، تۇز بەن بۇرىش تاتىمىنا قاراي.

دايىنداۋ ءتاسىلى:

سالقىن سۋ قۇيىلعان كاستريۋلگە سالىنعان قازى 2 ساعات اسىلادى. وتتى بارىنشا باسەىدەتەدى. ءبىر قايناعاننان كەيىن بىرنەشە جەرىنەن ىسكەكتەلەدى. سوندا قازى جارىلىپ كەتپەيدى.

شۇڭعىل قازانعا ماي قىزدىرىلىپ، وعان پياز شالا قۋىرىلادى دا، ۇزىنشالاپ كەسىلگەن ءسابىز سالىنىپ، پيازبەن ارالاستىرىلادى. قازانعا پىسكەن قازى تۇتاس سالىنىپ، ۇستىنە سۋ قۇيىلادى دا ءسابىز پىسكەنشە تاعى دا اسىلادى.

بۇل پالاۋدىڭ كۇرىشى الدىن-الا كۇرمەگىنەن تازارتىلىپ، 1،5-2 ساعات سۋعا سالىنىپ قويىلادى. سودان سوڭ قازانعا تەگىستەپ سالىنادى دا 1،5 سانتيمەتر اسىپ تۇراتىنداي ەتىلىپ سۋ قۇيىلادى. وت كۇشەيتىلىپ، قاتتى قايناتىلادى. سۋى تارتىلعان سوڭ كۇرىش اۋدارىستىرىلادى. ەگەر كۇرىش جارىلماسا، ۇستىنە ازداپ ىستىڭ سۋ قۇيىلىپ، ودان ءارى اسىلادى. سودان كەيىن جان-جاعى ورتاسىنا قاراي ىسىرىلىپ، ۇيىلەدى. بىر-ەكى جەرىنەن بۋ شىعىپ تۇراتىن ساڭىلاۋ جاسالىپ، قازاننىڭ قاقپاعى تىعىزداپ جابىلادى دا، وت وشىرىلەدى. ءسويتىپ 25-30 مينۋت ءوز بۋىنا پىسىرىلەدى.

پالاۋ پىسكەننەن كەيىن ىشىنەن قازى الىنادى دا پالاۋ ارالاستىرىلىپ، جايپاق تاباققا ۇيەمەلەپ سالىنادى. ال قازى ۇستىنە دوڭگەلەكتەپ تۋرالادى.

قۇس ەتىمەن باسىلعان پالاۋ

قۇرامى:

560 گرامم قىرعاۋىل نەمەسە ۇيرەك ەتى، 2 اس قاسىق توڭ ماي، 2-3 پياز، 1 شاي قاسىق ۇساقتالعان پەترۋشكا تامىرى، 4-5 ءسابىز، 500 گرامم كۇرىش، تۇز بەن بۇرىش تاتىمىنا قاراي.

دايىنداۋ ءتاسىلى:

قىرعاۋىل نەمەسە ۇيرەك ەتى سۇيەگىمەن قوسىپ شابىلادى دا پيازبەن بىرگە ابدەن قۋىرىلادى. بولەك ىدىسقا قىزدىرىلعان مايعا ۇزىنشالاپ كەسىلگەن ءسابىز، پەترۋشكا تامىرى، پيازدىڭ قالعانى قۋىرىلادى. تۇزدالىپ، بۇرىشتالادى. ۇستىنە سورپا قۇيىلادى. ءبىر قايناعاننان كەيىن كۇرىش سالىنادى دا، وتىن باسىڭقىراپ قويىپ، سۋى تارتىلعانشا قايناتىلادى. بىرنەشە تۇسىنان تەسىلەدى. وت بارىنشا باسەڭدەتىلەدى. قازاننىڭ قاقپاعى تىعىزداپ جابىلادى دا جان-جاعى ورامالمەن، نە قالىڭ ماتامەن ورالىپ تاستالادى.

پىسكەن پالاۋ جاقسىلاپ ارالاستىرىلادى. تاباققا ورتا تۇسى ءۇيىپ سالىنادى. بەتى ماناعى قۋىرىلعان قۇس ەتىمەن جابىلادى.

مەيىز پالاۋ

قۇرامى:

400 گرامم قوي ەتى، 2-3 پياز، 5-6 ءسابىز، 1 كەسەگە جۋىق كۇرىش، 2 اس قاسىق مەيىز، 2 اس قاسىىق وسىمدىك مايى، تۇز بەن بۇرىش تاتىمىنا قاراي، 1 اس قاسىق اسكوك.

دايىنداۋ ءتاسىلى:

قازانعا قىزدىرىلعان مايعا تۋرالعان قوي ەتى سالىنىپ، ۇزىنشالاپ كەسىلگەن ءسابىز، ۇساقتاپ تۋرالعان پياز قوسىلادى دا، جاقسىلاپ قۋىرىلادى. تۇزدالىپ، بۇرىشتالادى. ۇستىنە اۋەلى وسى پالاۋعا ارنالعان كۇرىشتىڭ جارتىسى، ودان كەيىن مەيىز، ونىڭ ۇستىنە كۇرىشتىڭ قالعانى سالىنادى دا، قايناپ تۇرعان سۋ قۇيىلىپ، قازاننىڭ قاقپاعى تىعىزداپ جابىلادى. سودان كەيىن وتى باسىڭقىراپ قويىپ پىسىرىلەدى.

پىسكەننەن كەيىن ۇلكەن ىدىسقا سالىنىپ، بەتى كوكپەن اسەمدەلەدى.        

بيداي پالاۋ

قۇرامى:

500 گرامم بيداي جارماسى، 500 گرامم قوي ەتى (سيىر ەتى دە جارايدى)، 2-3 پياز، 150 گرامم قۇيرىق ماي، 1 اس قاسىق اشكوك، تۇز بەن بۇرىش تاتىمىنا قاراي.

دايىنداۋ ءتاسىلى:

قوي ەتى تۋرالماي، ءىرى كەسەك كۇيىندە ءپىسىرىپ الىنادى. سودان سوڭ كەسەگى 5-7 گرامنان كەلەتىندەي ەتىلىپ تۋرالادى. سورپاسى سۇزىلەدى. تۇزدالادى. قويدىڭ قۇيرىق مايى مەن ءسال قۋىرىلعان پياز قوسىپ ءبىر قايناتىلادى دا، الدىن الا ىرىكتەلىپ، جۋىلعان بيداي جارماسى سالىنادى. ودان ءارى بوتقا سەكىلدى پىسىرىلە بەرەدى.

پىسكەن بيداي بوتقاسىنىڭ ۇستىنە ماناعى اسىلىپ، تۋرالعان ەت سالىنىپ، جاقسىلاپ ارالاستىرىلادى. ەتتى سالار كەزدە سورپاعا باتىرىپ العان دۇرىس.

داستارقانعا اكەلەردە بيداي پالاۋىنىڭ بەتىنە ۇساقتالعان اشكوك سەبىلەدى.

---