اقساق قۇلا (ءى نۇسقا)
ەرتەدە بىرەۋدىڭ قۇلا تۇلپارى بولىپتى. سول تۇلپاردىڭ تۇقىمىن كوبەيتەمىن دەپ، تۇلپاردىڭ قاسىنا بيە قوسىپ، ەكەۋىن تەڭىزدىڭ ورتاسىنداعى ادام جۇرمەيتىن ارالعا اپارىپ تاستاپتى. تۇلپار قاسقىرعا دا، ادامعا دا الدىرمايدى ەكەن.
ارادا ءبىراز جىلدار ءوتىپ، تۇلپاردىڭ تۇياعى كوبەيىپ، ءبىر ءۇيىر جىلقىعا جەتەدى. وسى تۇلپاردىڭ ارالدا دەگەن حابارىن ەستىگەن ۇرىلار قۇلانى ۇيىرىمەن الىپ كەتپەكشى بولىپ ارالعا بارادى. اۋەلدەن مىنەزى تەنتەك، ونىڭ ۇستىنە كوپ جىلدان بەرى ادام كورمەي جاتىرقاپ قالعان تۇلپار ۇرىلاردى كورە سالا شابۋىلعا شىعادى. الدىنا كەلگەنىن تىستەپ، ارتىنا كەلگەنىن تەۋىپ، ۇرىلاردى جولاتپايدى. ايعىرمەن ارپالىسىپ، ابدەن شارشاعان ۇرىلار الدىرمايتىنىنا كوزدەرى جەتىپ، تۇلپاردى امالسىزدان ساداقپەن اتادى. وق قۇلانىڭ اياعىنان ءتيىپ، اقساتادى. جارالانعان اقساق قۇلا بۇرىنعىدان دا قاتۋلانىپ، ۇرىلاردى تاپاۋعا شىعادى. السىرەگەن قاراقشىلار ءبىر شۇڭقىرعا ءتۇسىپ جان ساقتاماقشى بولادى. مۇنى كورىپ اشۋلانعان اقساق قۇلا ايعىر وزىنەن وربىگەن ءبىر ءۇيىر تۇقىمىن باستاپ ۇرىلاردىڭ ۇستىنەن تاپاپ ءوتىپ، ولار دى جانشىپ كەتەدى. ءسويتىپ، تۇلپار ۇيىرىمەن جاۋىن تالقانداپ، تىنىش ءومىر ءسۇرىپتى، — دەسەدى.
You Might Also Like
-
قازاق پەن قالماق اراسىنداعى جاۋگەرشىلىگى كوپ زاماندا ەكى ەلدى ەگەستىرگەن ماسەلەنىڭ ءتۇيىنى ۇدايى نايزانىڭ ۇشىمەن، قىلىشتىڭ جۇزىمەن عانا شەشىلىپ وتىرماعان. نايزادان ءوتىمدى سوزگە توقتاعان، قىلىشتان ءوت...
-
ءبىر بايدىڭ قىزىن ۇزاتقاندا قىزدىڭ مال-مۇلىك جاساۋىنا قوسىپ ءبىر كەدەيدىڭ دومبىراشى جالعىز قىزىن كۇڭ رەتىندە شاڭىراققا مىنگىزىپ بەرەدى. باي بيلىگىنە قارسى تۇرار دارمەن جوق، اتا سالتىن بۇزارعا قاقىسى ...
