InfoHub Logo

ءبىر ورتا جاستان اسقان ادام مەن، ءبىر جاس جىگىت جول ءجۇرىپ كەلە جاتادى. ەكەۋىنىڭ دە تىرشىلىگى قۇباتوبەل، مىنگەن كولىكتەرى شارداق ەكەن. كۇن تۇسكە تىرمىسقان شاقتا ءبىر بەلدەن اسىپ تۇسكەن جولاۋشىلار قايران قالىپ تۇرىپ قالادى. الدارىندا مال تۇياعى تيمەگەن، شۇيگىن جايلاۋ، كوك سازدىڭ قاق ورتاسىندا توعىز قانات وق وردا تىگۋلى تۇر. مىنەزى جەڭىلتەكتەۋ جاس جىگىت «اپىر-اي، بۇل كىمنىڭ اۋىلى ەكەن، بۇل جەرگە ەشكىم قونباۋشى ەدى عوي» دەي بەرگەندە كورگەنى كوپ قاراساقال: «سابىر ەت بالام، بۇل تەگىن ءۇي ەمەس، نە دە بولسا، بارىپ كورەيىك»، — دەيدى. ەكەۋى دە قازاقى ەسكى ادەتپەن اتتان ءتۇسىپ، اتتارىن جەتەلەپ اۋىلعا جاياۋ كەلەدى. ءۇيدىڭ تۇسىنا كەلگەندە ەرەسەگى: «شولدەدىك، سۋسىن كەلتىرىڭىز»، — دەيدى. سول ساتتە سىقىرلاۋىق ايقارا اشىلىپ، ىشىنەن ءبىر جان يەسى شىعادى. ءبىر قولىندا كون شەلەككە قۇيىلعان قوي ءسۇتىنىڭ ايرانى، ەكىنشى قولىندا سۇيرەتپە تولى قىسىراقتىڭ قىمىزى ەكەن. اسىعىس قيمىلدايتىن جاس جىگىت كون شەلەكتى قاعىپ الادى دا، مۇزداي ايراندى باسىنا ءبىر-اق كوتەرەدى. ال ەرەسەك اسىقپاي سۇيرەتپەنىڭ اۋزىن شەشىپ، قوينىنان توستاعان الىپ، سوعان قۇيىپ ءبىر توستاعان قىمىز ىشەدى. سوندا سۋسىن الىپ شىققان ءۇيدىڭ يەسى جاس جىگىتتىڭ بەتىنە قاراپ تۇرىپ: «سابىرسىز نەمە! قويلى بولادى ەكەنسىڭ»، — دەيدى دە، ۇلكەن ادامعا بۇرىلىپ، «ال ءسىزدىڭ جىلقىڭىز كوپ بولادى ەكەن»، — دەيدى. بىلاي شىققاننان كەيىن جىگىت جولسەرىگىنەن: «بۇ نە كەرەمەت، مىنا تۇرعان ءۇي نە، ءۇيدىڭ يەسى كىم؟» دەپ سۇرايدى. سەرىگى — «ۇندەمە، قۇداي جارىلقادى، بىزگە بەگىمسالدىڭ ءوزى جولىقتى»، — دەيدى. كوپ ۇزاماي وسى ەكى ادام جەر قايىسقان مال يەسى بولىپ شىعادى.

 

---