Cونگەن ءۇمىت
بولمە. شام جارىعى. سوعىلعان ساعاتتىڭ ءۇنى. ۇنسىزدىك. نوۋتبۋكتىڭ الدىندا ءبىرتالاي ۋاقىت وتىرعان ايساۋلە. ول ءبىر ءسات بار الەمنەن بولەكتەنىپ كەتكەندەي كۇيدە. ەشكىمنىڭ سوزىنە قۇلاق اسار ەمەس. ەشكىمگە ءتىل قاتار ەمەس. وزىمەن ءوزى وتىرعان قالپى...
ايساۋلەنىڭ ومىرىندە اۋىر كەزەڭدەر دە، كوز جاسى دا، ءتۇڭىلۋ دە بولعان. ونىڭ تولىققاندى ومىرگە قايتا ورالۋىنا مىنا عالامتور سەبەپكەر مە ەكەن؟! الدە... نە بولسا دا بۇل نوۋتبۋكپەن ونىڭ جاقىن ارادا قوشتاساتىن ءتۇرى جوق.
زىمىراعان ۋاقىت. كۇندەر. تۇندەر. ءوز الەمىندە ءومىر ءسۇرىپ جاتقان ايساۋلە. عالامتور. الەۋمەتتىك جەلى. سانسىز حاتتار. جىلى سوزدەر. تىلەكتەر. مۇنىڭ ءبارىن ايساۋلەگە جولداپ جاتقان الەۋمەتتىك جەلىدە تانىسقان جىگىتى، اسقار ساقتاعانوۆ دەگەن ازامات. ايساۋلە اسقارعا سەنەدى، ەندىگى بار ويى ونىمەن كوزبە-كوز جولىعۋ، جاقىنىراق تانىسۋ. ايساۋلە ول كەزدەسۋگە ءالى ىشتەي دايىن ەمەس سياقتى. كەزدەسۋ تۋرالى اسقار دا ءالى ءسوز قوزعار ەمەس.
تاڭ. تەرەزەدەن بولمەگە تۇسكەن كۇن نۇرى. ۇيقىدان ويانعان ايساۋلە. قىزىق، ول ادەتتەگىدەي ەمەس، بۇگىن نوۋتبۋكتى قوسۋعا اسىقپايدى. الدەنەگە كوڭىلدەنىپ، ءماز بوپ جاتىر.
ساسكە. ساباعىنان قايتىپ كەلگەن ايساۋلە تۇسكى اسىن ىشەر-ىشپەستەن بولمەسىنە اسىقتى. نوۋتبۋكتى قوسقان ول ورنىندا قاتىپ قالدى. كوپتەن كۇتكەن ارمانى...
تەمىر جول ۆوكزالى. جان-جاققا اسىعىپ جاتقان ادامدار. ءبىرىنىڭ ارتىنا ءبىرى ىلەسىپ جاتقان ماشينالار. جۇرەك ءلۇپىلى. كۇتۋ. قوبالجۋ. ايساۋلە ارمانىنىڭ ورىندالۋىنا ساناۋلى عانا مينۋت قالدى. شامالى عانا قالدى.
ايالداماعا جاقىنداعان ءبىر بەينە. سۇڭعاق بويلى، سىمباتتى جىگىت. وسى ما ەكەن؟ قۋانىش سەزىمى قىز جۇرەگىنە ۇيالاعانداي.
ۇيالى تەلەفونعا كەلگەن سمس. ايساۋلە، كەشىر مەنى... مەندەي جامان ادامدى. مەن سەن ويلاعانداي ەمەسپىن. ۇيلەنگەنمىن، ەكى بالام بار. ايتا المادىم، كەشىرە گور. سەنى كەزدەسۋگە شاقىردىم، ءبىراق بارار بەتىم جوق. قوش...
ءسوندى ءۇمىت. سوڭعى ءۇمىت. قالدى ەستە بۇلدىر ەلەس. كوز دە كورمەس. ءسوز دە قالماس. ەندى بۇل ءسات قايتىپ كەلمەس.
ۆوكزال. اينالا اعىلعان حالىق. زور داۋىسپەن ايعاي سالاتىن تاكسيستەر. اۋىلعا اسىعىپ جول سومكەلەرىن ارقالاعان ستۋدەنتتەر. ايالداما. قاتىپ قالعان قالپىندا تۇرعان ايساۋلە. ءۇمىتى ۇزىلگەن ايساۋلە. ومىردەن قايتا تۇڭىلگەن ايساۋلە...
جاكسىبايەۆا بوتاگوز جاكسىبايەۆنا
You Might Also Like
-
«ۇبت - (ۇلتتىق ءبىرىڭعاي تەستتىلەۋ) - جوعارعى وقۋ ورىنىنا، ۇلكەن بەلەستەرگە دەگەن العاشقى قادام جانە شەشۋشى ءسات بولماق» - دەيتىندەر وتە كوپ. ءبىراق، ءومىر مۇنىمەن توقتاپ قالمايدى. بۇل ۇبت-...
