كۇن مەن قايىڭ
ءساۋىردىڭ شۋاقتى كۇنى. دالا قىس ىزعارىنىڭ كەتكەنىنە قۋانىپ، قوجالىققا كوكتەمدى شاقىرعان كەز ەدى. اسپانداعى جارقىراعان كۇن جەر ۇستىندەگى بارلىق تىرشىلىك يەسىن ەركەلەتكەندەي، جىلۋىن اياماي توگىپ تۇر. كۇن استىندا قارلىعاشتار ءبىر-بىرىن قۋا ۇشىپ، اسەم كۇننىڭ ءبىر مۇشەسى ەكەندەرىن سەزدىرۋدە.
ءبىر توپ ادام اۋىل شەتىندەگى جازىق جەرگە جينالا باستادى. قولدارىندا كۇرەكتەرى، اعاش تالدارى، شەلەكتەرى بار. ءبىراز اڭگىمەلەسكەننەن كەيىن قولدارىنداعى كۇرەكپەن جەر قازىپ، الىپ كەلگەن تالدارىن وتىرعىزا باستادى.
ارادا ۇزاق كۇندەر ءوتتى. كوكتەم جازعا اۋىستى. كۇننىڭ كوزى جاس ەگىلگەن اعاشتاردى تاڭ اتقاننان كەشكە دەيىن قاراۋسىز قالدىرمادى. اراسىنا بىر-ەكى كۇن جاۋىن جاۋىپ، جەر ابدەن ءشولىن قاندىرىپ تۇردى.
تاعى ءبىر تاڭ اتتى. جاس تال تاڭدى قۇستاردىڭ انىمەن قارسى الدى. اقىرىنداپ، كۇننىڭ كوزى جوعارىلاپ تالدىڭ ءدال ۇستىنە كەلدى. تال قۋانا كۇن كوزىنە تارتىلا، جاڭا وسكەن اقشىل-جاسىل جاپىراقتارىن سوزدى. ول ءوزىنىڭ كۇن ساۋلەسىنە عاشىق ەكەنىن سەزدى. كۇن ساۋلەسى دە ءوز جىلۋىن ايامادى. ءار كەشتە ءبىر-بىرىن قيماي، كەلەسى كۇندى اسىعا توستى. وسىلاي كوپ كۇندەر ءوتتى. جاز سوڭىندا تال ءبىراز بوي كوتەرىپ، مىقتى جاس اعاشقا اينالدى. جاپىراقتارىن جەلبىرەتىپ كۇنگە سوزىلا ۇسىندى، ءبىراق كۇننىڭ كوزى ءوز جىلۋىن ازايتا باستادى. كۇزدىڭ كەي كۇنىندە مۇلدەم كورىنبەيتىن ساتتەر بولدى. جاس اعاش تابيعاتتىڭ بۇل مىنەزىن تۇسىنبەي قاتتى قايعىردى. كوڭىلىمەن بىرگە جاپىراقتارى اقىرىنداپ سارعايا باستادى. جاس اعاش كۇننىڭ كوزىن ساعىنىپ، ودان ءۇمىت ۇزەدى. ول بارلىق وسىرگەن جاپىراقتارىن سارعايتىپ، ولاردى وزىنەن ءۇزىپ جىبەرەدى.
كۇزدىڭ سوڭعى كۇندەرى جاس اعاشتىڭ بۇتاعىنا تورعاي وتىرادى. تورعاي جاس اعاشتىڭ مۇڭىن ءتۇسىنىپ: «سەن قاتتى قايعىرما، كۇننىڭ كوزى تاعى كەلەدى» — دەپ ۇشىپ كەتەدى. بۇنى ەستىگەن جاس اعاش قاتتى قۋانىپ، كەلەسى كوكتەمنىڭ كەلگەنىن كۇتە باستايدى.
وكسانا اسىلبەك قىزى سەيسەنبايەۆا
You Might Also Like
-
ناۋشا كىشكەنتايىنان بىرگە ويناپ، تاي-قۇلىنداي تەبىسكەن قۇرداسى، ءارى اتالاسى شەركەش بي ەكەۋى بوكەيلىكتى تاستاپ، جايىقتىڭ شىعىس بەتىندەگى اتا قونىستارىنا كوشەدى. بۇل شامامەن ءحىح عاسىردىڭ جيىرما جەتى،...
