Ақмола облысында сот емханадан пациенттің пайдасына дәрігерлердің диагностика мен емдеуде жіберген қателіктері үшін 1,6 млн теңгеден астам соманы өндіріп берді, деп хабарлайды infohub.kz сайты.
Ақмола облысы соттарының ресми Telegram-арнасында хабарланғандай, алқа пациенттің Целиноград аудандық емханасы мен үш дәрігерге қатысты жоғалтқан табысын, емдеу шығындарын және моральдық зиянның өтемақысын өндіру туралы талап арызы бойынша азаматтық істі қарады.
Бірінші сатыдағы соттың шешімімен талап ішінара қанағаттандырылды. Талапкердің пайдасына емханадан 700 мың теңге көлемінде моральдық зиянның өтемақысы өндірілді, ал жоғалтқан табыс пен емдеу шығындарын өндіру туралы талаптың қанағаттандырылуынан бас тартылды.
Облыстық сот алқасы мынаны анықтады. 2025 жылдың шілдесінде ЖШС-те механизатор болып жұмыс істейтін талапкер бас ауруы, жөтел, мұрынның бітелуі, дене қызуының жоғарылауы, иықтың ауыруы сияқты шағымдармен аудандық емханаға жүгінді. Диагноз қойылды: ЖРВИ, жедел назофарингит, өршу сатысындағы созылмалы бронхит, полисегментарлы пневмония.
Бірнеше күннен кейін ер адам қолдары мен иық буынының ауыруы және ісінуі туралы шағымдармен емханаға қайта жүгінді. Дәрігерлердің бірі ревматоидты артрит диагнозын қойып, травматологтың кеңесін ұсынды. Травматолог иық буынының байламдарының созылуы, шамадан тыс кернеуі деген диагноз қойды. Үшінші дәрігер травматологтың диагнозын қайталады.
Бір аптадан кейін талапкер шұғыл түрде Астанадағы ауруханаға жатқызылды, онда оған сол жақ жоғарғы аяқтың, иық асты және иық үсті аймақтарының флегмонасы диагнозы қойылды. Шұғыл хирургиялық операция жасалып, шамамен 1,5 литр ірің сорып алынды.
Қате қойылған диагноз бен емдеудің салдарынан денсаулыққа ұзақ уақыт еңбекке жарамсыздықпен зиян келтірілді. Сараптама комиссиясының қорытындысы бойынша, аудандық емхананың дәрігерлері қателіктер жіберген: диагностиканы уақтылы жүргізбеу, талдаулар мен зерттеулерді елемеу, бұл гематома мен флегмонаның дамуына әкеліп соқты, нәтижесінде хирургиялық араласуға, иық буынының функциясының бұзылуына әкелді.
Комиссияның қорытындысымен медицина қызметкерлерінің әрекеттері мен келтірілген зиян арасындағы себептік байланыс анықталды: пациенттің шағымдарына тиісті көңіл бөлінбеген, анамнез үстірт жасалған, қойылған диагноз толық емес.
Алқа қаулысымен бірінші сатыдағы соттың шешімі жоғалтқан табыс сомасын өндіру туралы талапты қанағаттандырудан бас тарту бөлігінде өзгертіліп, жаңа шешім қабылданды. Алқа емханадан пациенттің пайдасына 914 мың теңге көлемінде жоғалтқан табыс сомасын өндірді, өйткені ол ұзақ уақыт еңбекке жарамсыздық парағында болды. Қалған бөлігінде сот шешімі өзгеріссіз қалды.
Емдеу шығындарын (дәрі-дәрмек сатып алу) өндіруден бас тартылды, өйткені бұл шығындарды сақтандыру компаниясы жабады. Сот актілері заңды күшіне енді.