Алакөл көлінде үрлемелі қайық істен шығып, алты адам, оның ішінде төрт бала, қауіпті жағдайда қалды. Бұл туралы infohub.kz хабарлады.
Абай облысы Төтенше жағдайлар департаментінің жедел-құтқару жасағына көмек туралы хабар келіп түсті. Мақаншы ауылы маңындағы Аралтөбе аралында демалып жүрген адамдар жағаға өз бетімен шыға алмағаны айтылды.
«Құтқарушылар іздеуге шықты. Адамдар бар қайықты жағадан шамамен 11 шақырым қашықтықта тапты. Бортта алты адам – екі ересек және төрт бала болған. ТЖМ қызметкерлері барлық демалысшыларды аман-есен эвакуациялап, жағаға жеткізді. Бақытымызға орай, ешкімге медициналық көмек қажет болмады», – деді ТЖМ-де.
ТЖМ мамандары суға шығар алдында қайық пен жабдықтың жарамдылығын тексеруді, ауа райын ескеруді және байланыс құралдары мен құтқару кеудешелерінсіз алысқа жүзбеуді ескертті.
Бұған дейін Жетісу облысындағы Алакөлде отбасылық демалыс кезінде болған екі қайғылы оқиға хабарланған болатын. Бірінші жағдайда көлде екі гидроцикл соқтығысып, салдарынан бір адам қаза тауып, тағы біреуі жараланған. Екінші оқиғада 70 жастағы әйел кері жылжып бара жатқан паромның астына түсіп, екі аяғынан айырылған.