Алматыда дау-дамай өршіп тұр: мұғалім мектепте терезе жуып жатқан видеосын жариялап, педагогтарды оқу жылы басталмай тұрып үй-жайды тазалауға мәжбүрлейтінін айтты. Оның айтуынша, мұндай жұмыстан бас тарту оқу жүктемесінің қысқаруына әкелуі мүмкін. Оқу орнында тексеру басталды, деп хабарлайды infohub.kz.
Әйелдің айтуынша, мұғалімдер жаңа оқу жылына кабинеттерді дайындау үшін тамыз айында-ақ жұмысқа шығуға мәжбүр. Жарияланған кадрларда оның мектеп терезесін өз қолымен жуып жатқаны көрінеді. Педагогтың сөзінше, бұл жұмыстан бас тартқан жағдайда басшылық санкция қолдануы мүмкін — мысалы, оқу сағаттарының санын азайту. Сонымен қатар, оның айтуынша, бұрын мұғалімдер мектепті жөндеуге өз ақшасын тапсыруға мәжбүр болған.
«Курсив» басылымы Алматы қалалық білім басқармасына жүгінгеннен кейін арнайы мониторингтік топ құрылып, ол мектепке жіберілді. Ведомство мәлімдегендей: «Тексеру аясында мұғалімдер құрамы мен мектептің әкімшілік-шаруашылық персоналынан сауалнама алынып, барлық мән-жай анықталады және мұғалімдердің еңбек міндеттеріне кірмейтін жұмыстарға тартылуы мүмкін деген ақпарат тексеріледі». Тексеру нәтижелері мен ықтимал шаралар туралы қосымша хабарлауға уәде берді. Жағдайды білім басқармасының басшысы жеке бақылауына алды.
Айта кету керек, Қазақстанда педагогтарды өз міндеттеріне жатпайтын жұмыстардан қорғау мәселесі мемлекеттік деңгейде бірнеше рет көтерілді. «Педагог мәртебесі туралы» заң мұғалімдерді кәсіби міндеттеріне жатпайтын жұмыс түрлеріне тартуға шектеу қояды. Президент Қасым-Жомарт Тоқаев та педагогтардың құқықтарын сақтауды және оларды негізгі жұмысынан алшақтатпауды бірнеше рет талап етті.