Алматыда 2026 жылдың 31 тамызынан бастап Саин көшесіндегі қоғамдық көлікке арналған бөлек жолақ жойылады, деп хабарлайды infohub.kz сайты.
Қала әкімдігінде түсіндіргендей, пилоттық жоба аяқталды, ал оның нәтижелері қаланың негізгі магистральдарында автобустарға басымдық берудің бірыңғай схемасын әзірлеу кезінде пайдаланылады.
Саин көшесіндегі бөлек жолақ сынақ режимінде 20 маусымнан бастап іске қосылған еді. Мақсат – Алматыдағы ең жүктелген магистральдардың бірінде қоғамдық көлік жылдамдығына әсерін бағалау.
Мониторинг автобустардың шынымен де жылдам жүре бастағанын көрсетті. Таңғы сағаттарда орташа жылдамдық 26,2-ден 31,8 км/сағ-қа, кешкі уақытта 25-тен 30,4 км/сағ-қа дейін өсті.
Қозғалыс интервалы да қысқарды: толық күн ішінде ол 13,6-дан 12 минутқа, ал таңғы сағаттарда 13,6-дан 11,6 минутқа дейін төмендеді.
Сонымен қатар, жолаушылар ағыны шамамен 5%-ға өсті – тәулігіне 42,4 мыңнан 44,5 мың жолаушыға дейін.
Әкімдікте пилот қоғамдық көлікке басымдық берудің тиімділігін растады деп санайды. Алайда енді қалада жекелеген бөлек жолақтардан бірыңғай жүйеге көшу көзделуде.
Саин көшесі әл-Фараби даңғылын, Саин көшесін, Рысқұлов даңғылын және Шығыс айналма жолын байланыстыратын кешенді схемаға енуі тиіс. Осы бағытта қоғамдық көлікке басымдық беру жоспарлануда.
Ол үшін алдымен желінің басқа учаскелерін дайындап, қолданыстағы нормативтік құжаттарға өзгерістер енгізу қажет.
Бұған дейін әкімдік бөлек жолақ қозғалысты ретке келтіруге және жол қауіпсіздігін арттыруға көмектеседі деп есептеген. Алайда ол пайда болғаннан кейін жүргізушілер ұзын кезектер мен автобус жолағына шығатын көліктерге шағымданған.
Кеше Саин көшесінде жүргізушілер арасында жанжал болып, төбелеске ұласқан.
Қажетті инфрақұрылым мен нормативтік база дайындалғаннан кейін Саин көшесіндегі басымдықты қозғалысты бірыңғай кешенді схема құрамында қайтару жоспарлануда.