Елордада бір әйел баласының оқуына берілген рассрочканы жойып, ақшасын қайтарып алды. Бұл туралы infohub.kz сайты хабарлайды.
Тұтынушылардың құқығын қорғау комитетінің мәліметінше, биылғы жылдың маусым айының басында азаматша баласының оқуына 575 мың теңге көлеміндегі қаражатты рассрочкамен төлеген. Алайда бала сабаққа мүлдем келмеген, бірде-бір сабаққа қатыспаған.
Тұтынушы орындаушыға ақшаны қайтару туралы өтінішпен жүгінген. Құжат шартта көрсетілген мекенжай бойынша ұйым қызметкеріне тапсырылған. Сонымен қатар, әйел WhatsApp мессенджері арқылы компания өкіліне оқудан бас тарту ниеті туралы хабарлаған. Оған басқа кеңсеге барып, белгіленген үлгідегі өтінішті толтыруды ұсынған, ол оны орындаған.
Ұсынылған бланк мән-жайды, оның ішінде қызмет көрсетілмегенін толық жазуға мүмкіндік бермегендіктен, тұтынушы сол күні орындаушыға тапсырыс хатпен ақшаны толық қайтаруды талап етіп, шағым жіберген.
Уақытылы өтініш жасалғанына қарамастан, ақша заңда белгіленген мерзімде қайтарылмаған, ал рассрочка бойынша міндеттемелер жалғаса берген. Сонымен қатар, шартта 30 күндік қайтару мерзімі көрсетілген, бұл әйелдің пікірінше, оның ҚР заңнамасында кепілдендірілген құқықтарын бұзған.
Мәселе Астана қаласы бойынша Сауда және тұтынушылардың құқықтарын қорғау департаментінің араласуынан кейін шешілген. Қабылданған шаралардың нәтижесінде 575 мың теңге көлеміндегі рассрочка бойынша міндеттемелер тоқтатылған, себебі білім беру қызметтері іс жүзінде көрсетілмеген.
Мамандар қызмет көрсету шартын жасау кезінде, әсіресе шартты бұзу және ақшаны қайтару шарттарын мұқият зерделеуді ұсынады. Даулы жағдайларда жазбаша шағымды уақытылы жіберіп, оның жіберілгені мен алынғаны туралы дәлелдемелерді сақтау маңызды.